Sońǵy bes jyl ishinde Almaty oblysyna 269 jas dáriger kelgen
TALDYQORǴAN. QazAqparat - 2011-2015 jyldar aralyǵyn qamtyǵan «Salamatty Qazaqstan» memlekettik baǵdarlamasyn Almaty oblysy júzege asyrý úshin respýblıkalyq jáne jergilikti bıýdjetterden 24,4 mlrd teńge qarajat bólingen. Bul týraly Óńirlik kommýnıkatsııalar qyzmetinde ótken brıfıngte oblystyq densaýlyq saqtaý basqarmasynyń basshysy Ashan Baıdývalıev aıtty.
Sońǵy bes jyl ishinde oblystyń densaýlyq saqtaý salasyna bólingen jalpy qarajat kólemi 52%-ǵa ósip, 2015 jyly 68,7 mlrd teńgege jetti.
Materıaldyq-tehnıkalyq bazany nyǵaıtý, sony úlgidegi tehnologııalardy engizý jáne medıtsına qyzmetkerleriniń kásibı biliktiligin kóterý jumystary nátıjesinde sońǵy bes jylda qol jetkizilgen tabystar az emes. Mysaly, oblystaǵy demografııalyq ahýal jaqsardy - bala týý sany 2011 jylǵy 24,3-ten 2015 jyly 25,6-ǵa deıin ósken. Adamnyń ómir súrý jasy da uzarǵan (69,8-den 71,8 jasqa deıin). Ana men sábı ólimi de edáýir tómendegen.
Memlekettik «Salamatty Kazaqstan» baǵdarlamasy sheńberinde medıtsınalyq mekemelerdiń materıaldyq-tehnıkalyq bazasyn kúsheıtý úshin densaýlyq saqtaý mekemelerine 2 420,4 mln teńgege qural-jabdyqtar satyp alynǵan.
«100 mektep, 100 aýrýhana» baǵdarlamasy boıynsha oblysta 8 546,2 mln teńge jumsalǵan 8 nysan paıdalanýǵa berilgen. Al, «350 dárigerlik ambýlatorııa, medıtsınalyq pýnkt jáne feldsherlik-akýsherlik pýnkt» baǵdarlamasy aıasynda 7 178,8 mln teńgege 38 nysan iske qosylǵan.
Densaýlyq saqtaý salasy boıynsha mańyzdy máselelerdiń biri - dáriger-mamandardy, ásirese jastardy kóptep tartý. Sońǵy bes jyl ishinde oblysqa 269 jas maman kelgen. Olarǵa kóterme járdemaqy, baspana berilip, jeńildetilgen nesıe jáne basqa da áleýmettik jeńildikter usynylǵan. Shalǵaı aýyldardan túlep ushqan 82 stýdent oblys ákiminiń granty boıynsha elimizdegi medıtsınalyq joǵary oqý oryndarynda bilim alýda.
Degenmen, búgingi tańda oblys boıynsha nevrolog, epıdemıolog, allergolog mamandar jetispeıdi.
Sondaı-aq, BAQ ókilderimen ótken brıfıngte oblystyń bas dárigeri kelesi jyldan bastap júzege asyryla bastaıtyn mindetti áleýmettik medıtsınalyq saqtandyrý týraly tarqatyp aıtyp berdi. Búgingi tańda bul júıe aldymen dárigerlerdiń óz arasynda egjeı-tegjeıli túsindirilýde.
