Sońǵy 9 aıda sybaılas jemqorlyq qylmystardyń jalpy sany 8,7%-ǵa ósken - qarjy polıtsııasy
ASTANA. 24 qazan. QazAqparat - 9 aıdyń qorytyndysy boıynsha anyqtalǵan sybaılas jemqorlyq qylmystardyń jalpy sany 8,7%-ǵa ósken.
Bul týraly búgin Ekonomıkalyq qylmysqa jáne sybaılas jemqorlyqqa qarsy kúres agenttiginiń (qarjy polıtsııasynyń) tóraǵasy Rashıd Túsipbekovtiń qatysýymen ótken májiliste Sybaılas jemqorlyq qylmystardy ashý jáne aldyn alý departamentiniń bastyǵy Marat Seksembaev málimdedi dep habarlaıdy vedomstvonyń baspasóz qyzmeti.
M. Seksembaevtyń aıtýynsha, 9 aıdyń qorytyndysy boıynsha anyqtalǵan sybaılas jemqorlyq qylmystardyń jalpy sanynyń 8,7%-ǵa ósýimen (1525-ten 1657-ge deıin) qatar, jaýapkershilikke tartylǵan tulǵalar sanynyń (594-ten 785-ge deıin nemese 32%-ǵa) da artqandyǵy baıqalǵan.
«Aıaqtalǵan sybaılas jemqorlyq qylmystyq ister boıynsha anyqtalǵan zalal somasy 7,4 mlrd. teńgeni qurady, onyń 6,7 mlrd. teńgesi (nemese 90%) qaıtaryldy», - dep atap ótti M. Seksembaev.
Sonymen qatar, M.Seksembaev laýazymdy tulǵalardyń kóleńkeli ekonomıka sýbektilerine járdemdesý faktilerin áshkereleýge basa nazar aýdarylǵanyn aıtty.
Vedomstvonyń málimetinshe, Salyq organdary qyzmetkerleriniń jalǵan kásipkerlik sýbektilerine qamqorshylyq jasaýynyń 11 faktisi, keden organdary men shekara qyzmetkerleriniń qatysýymen jasalǵan 4 ekonomıkalyq kontrabanda faktisi anyqtaldy.
