Sońǵy 8 jylda qazaqstandyq sport klýbtary promoýterlerge qansha syıaqy tóledi
«Federatsııalardyń negizgi qyzmeti elimizde sport túrlerin damytýǵa jáne sportty ilgeriletýge baǵyttalǵan. Sonymen qatar, qazirgi ýaqytta sport sektsııalarynyń, sport mektepteriniń, sport klýbtarynyń jáne sport salasynda jumys isteıtinderdiń sanyn esepke alý boıynsha federatsııalardyń fýnktsııasy zańnamalyq turǵydan anyqtalmaǵan. Sonymen qatar, qazirgi ýaqytta promoýterlik kompanııalar aralas jekpe-jek, judyryqtasý jáne erejesiz jekpe-jek boıynsha kommertsııalyq týrnırler uıymdastyrýda. Promoýterlik kompanııalar týrnırler uıymdastyryp qana qoımaı, osy baǵyttarǵa kóp qarajat jumsaıdy, zaldar ashady, sportshylardy jattyqtyrady jáne búkil ındýstrııany qalyptastyrady. Alaıda, sport agentteri men promoýterlerdiń qyzmeti máselesi zańnamalyq deńgeıde rettelmegen», - delingen qujatta.
Mınıstrlik aqparatyna saı, Qazaqstan fýtbol federatsııasy ózderiniń deldaldarymen jumys isteý tártibi men erejesin bekitken.
Endi qalǵan klýbtar da sport agentterimen áriptestik jónindegi reglamentin aıqyndaýy tıis.
«Agentter talaptqa saı bolýy kerek. Mysaly, fýtbol qoǵamdastyǵy salasynda negizgi sharttardyń biri - agenttik komıssııanyń 10%-15%-y boıynsha FIFA tarapynan lıtsenzııanyń bolýy jáne talaptardyń saqtalýy. Sonymen qatar, Qazaqstan fýtbol federatsııasy ózderiniń deldaldarymen jumys jónindegi reglamentin bekitken. Ol óz kezeginde FIFA-nyń deldaldarmen jumys jónindegi reglamentiniń talaptary negizinde ázirlendi. Alaıda, bul normalar tek korporatıvtik. Tıisinshe, sport agentteri men promoýterlerdiń qyzmetin, qarjy aǵynyn retke keltirý oń áleýmettik-ekonomıkalyq nátıjege ákeledi. Mysaly, 2015 jyly klýbtar sport agentterine 200 myń dollar syıaqy tólengen. Al 2016 jyly - 829 370 dollar, 2017 jyly - 553 000 dollar, 2018 jyly - 930 922 dollar, 2019 jyly - 428 922 dollar, 2020 jyly - 808 174 dollar, 2021 jyly – 238 533 dollar, 2022 jyly - 513 573 dollar tólendi», - degen derek keltirilgen.
Buǵan qosa, tıisti qujatta 2000-2021 jyldar aralyǵynda Olımpıada oıyndarynda ulttyq qurama sportshylary jeńip alǵan lıtsenzııa sany 111-den 98-ge deıin qysqarǵany jáne oǵan qandaı faktorlar sebep bolǵany jazylǵan.