Sońǵy 8 jylda Qazaqstandaǵy óndiristik jaraqattaný kórsetkishi 30%-ǵa tómendedi

ASTANA. QazAqparat - Qazaqstanda 2008-2015 jyldar aralyǵynda óndiristik jaraqattaný kórsetkishi 29,5%-ǵa tómendedi. 2008 jyly óndiris oryndarynda 2 444 adam jaraqat alsa, 2015 jyly bul kórsetkish 1 723 adam boldy, dep habarlady QR Densaýlyq saqtaý jáne áleýmettik damý mınıstrliginiń baspasóz qyzmeti.

2005-2015 jyldar aralyǵyndaǵy óndiristik jaraqattan qaıtys bolǵan qazaqstandyqtardyń sany 2008 jylǵy 404 adamnan 2015 jyly 251 adamǵa, ıaǵnı 38,1 %-ǵa azaıdy.

Memlekettik organdar men jumys berýshilerdiń eńbekti qorǵaý men onyń qaýipsizdigi salasynda atqarǵan is-sharalary nátıjesinde jaqsy kórsetkishterge qol jetkizildi.

Esterińizge sala keteıik, 2016 jylǵy 1 qańtardan bastap elimizdiń óndiris oryndarynda eńbekti qorǵaý men onyń qaýipsizdigin basqarýdyń zamanaýı júıesin qurýǵa baǵyttalǵan jańa Eńbek kodeksi ázirlenip, kúshine endi. Eńbek kodeksinde qaýipsiz eńbek jaǵdaılaryn qamtamasyz etýde birigip is-sharalar atqarý úshin jumys berýshi men jumysshy taraptary ókilderin biriktirýge negizdelgen óndiristik keńes qurý kózdelgen.