Sońǵy 8 jylda Qazaqstanda medıtsınalyq kadrlar jetispeýshiligi 34 paıyzǵa azaıdy

ASTANA. QazAqparat - Densaýlyq saqtaý júıesin mamandarmen qamtamasyz etý boıynsha qabyldanǵan sharalar nátıjesinde 2007-2015 jyldar aralyǵynda Qazaqstanda respýblıkalyq jáne aımaqtyq deńgeıde medıtsına kadrlarynyń jetispeýshiligi 34 paıyzǵa nemese 2 myńnan astam adamǵa azaıdy.

«2005-2010 jyldar aralyǵynda medıtsınalyq JOO-da túlekter sanyn arttyrý barysynda barlyq mamandyqtar boıynsha dárigerler jetispeýshiligi tómendedi», - dep habarlandy QR Densaýlyq saqtaý jáne áleýmettik damý mınıstrliginen.

Aımaqtardy medıtsınalyq kadrlarmen qamtamasyz etý jáne medıtsınalyq JOO túlekterin jumysqa ornalastyrý maqsatynda QR DSÁDM birqatar keshendi sharalardy júzege asyrýda.

Osy oraıda mınıstrlik bastamasymen 2011 jyly «Bilim týraly» QR Zańyna medıtsınalyq mamandyqtar boıynsha memlekettik bıýdjet esebinen bilim alǵan túlekterdiń 3 jyl ishinde mindetti túrde jumyspen óteýi týraly norma engizildi. Joǵaryda atalǵan túzetýler kúshine engennen keıingi medıtsınalyq JOO-ǵa túsken stýdentterdiń alǵashqy túlekteri 2019 jyly oqýlaryn aıaqtaıdy.

Sonymen qatar jyl saıyn elimizdiń barlyq medıtsınalyq JOO-da QR DSÁDM, oblystyq, Astana jáne Almaty qalalyq densaýlyq saqtaý basqarmalary ókilderiniń, medıtsınalyq uıymdardyń bas dárigerleriniń jáne túlekterdiń qatysýymen bos oryndar jármeńkeleri ótkiziledi. Onyń nátıjesinde jas mamandar elimizdiń óńirlerindegi medıtsınalyq uıymdarǵa jumys isteýge jiberiledi.

«Munymen qosa, medıtsınalyq JOO túlekterin jumysqa ornalastyrý men olardy óńirlerge bólý boıynsha jyl saıynǵy QR DSÁDM jol kartasyna sáıkes, jas mamandardy bekitýdi jeke-jeke baqylaý júzege asyrylýda»,-deıdi vedomstvo ókilderi.