Sońǵy 8 aıda 4 mlrd. teńgeniń ónimi óndirilgen
ShYMKENT. QazAqparat - Ońtústik Qazaqstan oblysynda ónerkásip salasy basqa aımaqtarǵa qaraǵanda bir qatar alda ekeni belgili. Oblystyń kórsetkishin arttyrýǵa atsalysyp otyrǵan aýdandar az emes. Máselen, Qazyǵurt aýdanynda ónerkásip salasy qarqyn alyp keledi, dep habarlaıdy shymkenttv.kz. Qazirdiń ózinde aýdan kóleminde 16 kásiporyn jumys isteıdi. Eleýli eńbektiń jemisi, dáleli retinde 2016 jyldyń 8 aıynda ónerkásip salasynda óndirilgen ónim kólemi 4 mlrd. teńgege jýyqtaıdy. Bul kórsetkish ótken jylmen salystyrǵanda, 860 mln. teńgege artyǵymen oryndalyp otyr. «Lotus Food Company LLC» jaýapkershiligi shekteýli seriktestigi. Qurylysy 2014 jyldan bastaý alǵan bul seriktestik «Tez ázirlenetin taǵamdar» daıyndaý óndirisimen aınalysady. Jobalyq quny 472 mln. teńgeni quraıtyn kásiporynnyń qýattylyǵy myqty. Jylyna 620 myńnan asa qaptama ázirlenedi.
Ónimdi Respýblıka aýmaǵynyń barlyq qalalaryna ótkizý josparda bar. Kúndelikti turmysta joǵary suranysqa ıe, tez daıyndalatyn ónimder shyǵaratyn kásiporyn 58 adamdy jumyspen qamtýda. Jergilikti ónim aýyl turǵyndarynyń kóńilinen shyqty. Bul oraıda dáriger Balnur Ábdiraıymova tez ázirlenetin otandyq dámniń túski ýaqytta tıimdi ekenin atap aıtty.
Jylyna 1079 tonna ónim shyǵaratyn kásiporyn memlekettik saıasattyń jemisi bolyp tabylatyn ındýstrııalyq aımaqta iske qosylǵan. Bolashaqta munda aýyl sharýashylyǵy salasyna arnalǵan bıoorganıkalyq tyńaıtqyshtar shyǵaratyn fabrıka qurylady dep josparlanýda. Bul fabrıka TMD elderinde balamasy joq joba bolmaq.
