Sońǵy 6 aıda Almatyda 1031 jol-kólik oqıǵasy tirkelip, saldarynan 75 adam mert bolǵan
ALMATY. 12 shilde. QazAqparat /Ádilet Musahaev/ - Aǵymdaǵy jyldyń sońǵy 6 aıynda Almatyda 1031 jol-kólik oqıǵasy tirkelip, saldarynan 75 adam qaıǵyly qazaǵa dýshar bolsa, 1105 adam túrli dene jaraqatyn alǵan.
Bul jaıynda Almaty qalasy ІІD-niń Jol polıtsııasy basqarmasynyń baspasóz qyzmeti habarlady. Málimet boıynsha, onyń ishinde balalardyń qatysýymen 122 oqıǵa tirkelip, 6 bala qaza taýyp, 122 bala túrli dene jaraqatyn alyp aýrýhanaǵa túsken.
Oryn alǵan jol apattarynyń sany byltyrǵy jyldarmen salystyrǵanda tómen, degenmen de onyń sebepteri jyldan jylǵa qaıtalanýda. Ol balalardyń jol ústinde oınaýlary, jaqynda kele jatqan avtokóliktiń aldyn kesip ótýi, joldyń jıeginde turǵan avtokóliktiń tasasynan jolǵa júgirip shyǵý, belgilenbegen jerden joldy kesip ótý, jol boıynda oınaýy bolyp otyrǵan kórinedi.
Soǵan oraı jol polıtsııa basqarmalary qala kólemindegi avtomobıl joldaryndaǵy jol qozǵalysy qaýipsizdigin qamtamasyz etý, jol apattarynyń aldyn alý, jasóspirimder jaraqatyn azaıtý jáne balalar arasynda jol qozǵalys erejesin nasıhattaý maqsatynda respýblıka men qala aýmaǵynda túrli keshendi aldyn alý sharalar ótkizýde.
Jazǵy demalys kezinde kóshe men jol boıy balalarǵa toly bolatyny belgili. Tájirıbe men statıstıka kórsetip otyrǵandaı, dál osy jaz mezgilinde balalardyń jolda zardap shegý derekteri kóbeıedi. Oǵan sebep, kóp jaǵdaıda, jas balalar men jasóspirimder óz-ózderine berilip, úlkenderdiń qaraýynsyz qalyp jatatyndyǵy jáne jolda júrý erejelerine azamattardyń atústi qaraýy bolyp otyr. Bul jaıt jol polıtseılerdiń jumysyn qıyndatady, alańdatýda.
«Qurmetti júrgizýshiler jáne jaıaý júrginshiler, jolda balalarǵa degen nazardy burynǵydan da kúsheıtip, olardyń kóp shoǵyrlanatyn jerleri men mektep mańaılarynda, jaıaý júrginshiler ótkeline asa saq bolyp, kólikterińizdi múmkindiginshe jaı júrgizýdi umytpańyzdar. Jol ústindegi balalarymyzǵa kóńil aýdaryp, qastarynan ótip ketpeı, joldan ótýge kómektesip, olarǵa qaýipsizdigine mán berińizder!», -deıdi Almaty qalasy ІІD-niń Jol polıtsııasy basqarmasynyń bastyǵy polıtsııa polkovnıgi Arman Sarbasov.
