Sońǵy 5 jylda múgedek dep tanylǵandardyń sany 3 myńǵa deıin azaıdy

Búgin Parlament Májilisinde «Múmkindigi shekteýli azamattardyń quqyqtaryn qamtamasyz etý máseleleri» taqyrybynda ótken Úkimet saǵatynda Eńbek jáne halyqty áleýmettik qorǵaý mınıstri Gúlshara Ábdiqalyqova osylaı málim etti.

«Múgedektiktiń aldyn alý maqsatynda aldaǵy ýaqytta densaýlyq saqtaý mınıstrligimen birlesip, birqatar sharalar atqarý kózdelýde. Atap aıtqanda, barlyq baǵyttar boıynsha jumys jalǵasady. Jańa tehnologııalyq úderister, kásipter men óndiristik faktorlar eskerile otyryp, kásiptik aýrýlardyń tizimi keńeıtiledi. Kásiptik jáne óndiristik aýrýlar qateri joǵary toptardy bólý ólshemderi ázirlenedi. Osy toptaǵy azamattarǵa arnalǵan medıtsınalyq, emdeý, ońaltý ádistemesi jasalatyn bolady», - deıdi G. Ábdiqalyqova.

Onyń aıtýynsha, eńbek jaǵdaılary zııandy jáne qaýipti oryndarda jumys isteıtin qyzmetkerlerge mindetti kásiptik áleýmettik saqtandyrý júıesi jetildirilip otyr. Budan bólek, qazirgi tańda árbir múgedekke qatysty ońaltýdyń jeke baǵdarlamasy ázirlenip jatyr.

«Qazirgi kezde 140 myńnan astam múgedekterdiń jeke baǵdarlamalary bar. Degenmen, jumystyń osy kezeńinde birshama olqylyqtar oryn alyp otyr. Máselen, jekelegen jaǵdaıda múgedektik tobyn durys belgilemeý oryn alýda. Al keıbir múmkindigi shekteýli azamattarda ońaltýdyń jeke baǵdarlamasy joq. Al keı jaǵdaıda múgedekterdiń jeke muqtajdary men qajettilikteri eskerile bermeıdi. Bunyń oryn alýyna birqatar máseleler sebep bolýda. Máselenkı, densaýlyq saqtaý júıesiniń qyzmetkerlerine qaraǵanda, sarapshy dárigerdiń jalaqysy az. Sondyqtan da bul qyzmetke qyzyǵýshylyq ta tómen», - deıdi G. Ábdiqalyqova.