Sońǵy 5 jylda memlekettik qyzmetshi jastardyń úlesi tómendegen
«Memlekettik qyzmet isteri agenttiginiń deregine sáıkes, 2021 jylǵy 1 qańtardaǵy jaǵdaı boıynsha 29 jasqa deıingi memlekettik qyzmetshilerdiń sany 19 107 adamdy nemese jalpy memlekettik qyzmetshilerdiń 21,6%-yn qurady. 29 jasqa deıingi memlekettik qyzmetshilerdiń 53,5%-y ortalyq memlekettik organdarda, 46,5%-y jergilikti atqarýshy organdarda jumys isteıdi. Sońǵy 5 jylda jastardyń memlekettik qyzmettegi ókildigin taldaý nátıjesinde ortalyq jáne jergilikti atqarýshy organdarda eńbek etetin jastardyń úlesi tómendep kele jatqanyn baıqaýǵa bolady», - delingen qujatta.
Mınıstrlik bul baǵyttaǵy kemishilikterdi joıý úshin jastardy qoǵamdyq máselelerdi sheshý isine tartý jáne olardy kótermeleý tetikterin jetildirý qajet ekendigin atap ótken.
«Jastardyń jalpy qoǵamnyń problemalaryn sheshýge yqpal etýge degen umtylysyn kótermeleý kerek. Shetelderdiń tájirıbesi jastar parlamentarızmi ıdeıasyn ilgeriletýdi, saıası oı men pikirtalas mádenıetin damytýǵa baǵyttalǵan «Májilis modelin» damytýdy, zań jobalaryn qaraý jáne qabyldaý protsesterine tikeleı qatysýyn qamtamasyz etý jáne Májilis depýtattarymen dıalog ornatýdyń oryndylyǵyn kórsetedi», - dep usynys jazylǵan tujyrymdamada.
