Sońǵy 5 jylda maýsym aıynda dál osyndaı ınflıatsııa bolyp kórmegen – Ulttyq bank

NUR-SULTAN. QazAqparat – Maýsym aıynda aılyq ınflıatsııa 1,6 paıyzǵa jedeldegen. Ulttyq bank ókili Igor Osıpovtyń aıtýynsha, keıingi 5 jyldyń maýsym aılarynda mundaı ınflıatsııa bolyp kórmegen, dep habarlaıdy QazAqparat tilshisi.

Ultyq banktiń aqsha-kredıt saıasaty departamenti naqty sektor monıtorıngi basqarmasynyń bastyǵy Igor Osıpovtyń aıtýynsha, maýsym aıynda eldegi jyldyq ınflıatsııa 14,5%-ǵa (mamyrda – 14%) jedeldegen.

Aımaqtar arasynda Mańǵystaý (mamyrdaǵy 15,2%-dan maýsymda 17,0%-ǵa deıin) men Aqmola oblystarynda (13,9%-dan 15,3%-ǵa deıin) eń joǵary ınflıatsııa baıqaldy.

«Maýsym aıynda azyq-túlik baǵasynyń ósý qarqyny 19,2%-ǵa deıin (mamyrda – 19,0%) ulǵaıdy. Mundaǵy eń joǵary ósim Mańǵystaý oblysynda (23,6%) boldy. Al azyq-túlikke jatpaıtyn taýarlar baǵasynyń ósý qarqyny 13,2%-ǵa deıin (mamyrda – 11,9%) artty. Eń joǵary mán Nur-Sultan qalasynda (16,4%), al tómen mán – Shymkent qalasynda (10,8%) tirkeldi. Aqyly qyzmetterdiń baǵasy maýsymda 9,2%-ǵa ósti (mamyrda – 9,1%), bul rette Túrkistan oblysynda jalpy respýblıkalyq deńgeıden birshama joǵary (11,4%) boldy, al Atyraý oblysynda aıtarlyqtaı baıaý (6,0%) ósti. 2022 jyldyń maýsym aıynda eldegi aılyq ınflıatsııa 1,6% boldy. Bul sońǵy 5 jyl ishinde maýsym aılaryndaǵy ınflıatsııanyń ortasha máninen aıtarlyqtaı joǵary (2017-2021 jyldary: 0,5%) kórsetkish. Búkil óńirde 2022 jylǵy maýsymda baǵa ortasha tarıhı normasynan joǵary ósti. Aılyq ınflıatsııanyń aıtarlyqtaı qarqyny Mańǵystaý oblysynda (2,6%) tirkeldi», - dep jazylǵan Ulttyq banktiń resmı saıtynda jarııalanǵan túsindirmede.