Sońǵy 5 jylda Qazaqstannyń kólik salasyn damytýǵa 1,5 trln teńge baǵyttaldy
Bul týraly búgin QR Investıtsııalar jáne damý mınıstrligi kólik komıteti tóraǵasynyń orynbasary Dmıtrıı Potlov málim etti.
«Sońǵy 5 jylda Qazaqstannyń kólik salasyn damytýǵa 1,5 trln teńge baǵyttaldy. Bul Búkilálemdik ekonomıkalyq forýmnyń reıtınginde 2015 jyly 30 satyǵa joǵarylaýǵa múmkindik berdi. Qazaqstan 140 eldiń ishinde 88-orynnan 58-orynǵa kóterildi», - dedi D.Potlov OKQ brıfıngisinde.
Onyń sózine qaraǵanda, elde halyqaralyq kóliktik ınfraqurylymdardy damytý árbir memleket úshin mańyzdy, sebebi álemdik kóliktik júıege qosylý arqyly memleket óz taýarlaryn syrtqa shyǵarýǵa jáne tranzıttik júkterdiń úlesin arttyrýǵa qol jetkize alady.
«Búginde Uly Jibek jolyn jańǵyrtý boıynsha úlken jumystar júrgizilýde. Qazirgi ýaqytta Qazaqstanda 6 halyqaralyq kólik dálizi qurylǵan. Olar: Soltústik, Ońtústik, Ortalyq Azııalyq temirjol magıstraldary, Soltústik, Ońtústik jáne ózge de dálizder», - dep atap ótti ol.
Aıta keteıik, Qazaqstannyń kólik salasyn damytý 2015-2019 jyldarǵa arnalǵan «Nurly jol» baǵdarlamasynda qamtylǵan. Onyń aıasynda kólik ınfraqurylymyn damytýǵa 2,4 trln. teńge bólinedi.
