Sońǵy 5 jylda qazaqstandyqtar 33 mln ret «jedel járdem» shaqyrǵan

ASTANA. QazAqparat - 2011-2015 jyldar aralyǵynda Qazaqstannyń jedel medıtsınalyq járdem qyzmeti 33 mıllıon 615 myń 411 shaqyrtýǵa shyqty, dep habarlady QazAqparatqa QR Densaýlyq saqtaý jáne áleýmettik damý mınıstrliginiń baspasóz qyzmetinen.

Aımaqtar boıynsha alǵanda, shaqyrtýlardyń eń kóp sany Ońtústik Qazaqstan (4 mıllıon 619 myń qońyraý), Almaty (4 mıllıon 49 myń) jáne Shyǵys Qazaqstan (3 mıllıon 454 myń) oblystarynda sondaı-aq, Almaty qalasynda (3 mıllıon 452 myń) tirkelgen. Jedel járdem qyzmetine eń sırek habarlasqandar Atyraý oblysynyń turǵyndary bolyp shyqty - 5 jylda 858 myń qońyraý.

Sońǵy 10 jylda Qazaqstanda jedel medıtsınalyq járdem qyzmetine degen qajettilik ulǵaıyp keledi: 2005 jyly 4,6 mıllıon shaqyrtý bolsa, 2015 jyly bul kórsetkish 7 mıllıonnan asyp jyǵyldy.

Búginde jedel medıtsınalyq járdem qyzmetinde 20 myńnan astam adam eńbek etedi. Respýblıka boıynsha 24 derbes stansy jáne 62 qosalqy stansy jumys isteıdi, táýligine 1300 brıgada men avtokólik jumyldyrylady.