Sońǵy 5 jylda elimizde qan aınalysy júıesiniń aýrýlary azaıdy
ASTANA. 26 sáýir. QazAqparat /Rýslan Ǵabbasov/ - Sońǵy 5 jylda elimizde qan aınalysy júıesiniń aýrýlary azaıdy. Bul týraly búgin Úkimet otyrysynda Densaýlyq saqtaý mınıstri Salıdat Qaıyrbekova aıtty.
«Qabyldan sharalar sońǵy 5 jylda elimizde qan aınalysy júıesi aýrýlaryn tórtten bir bólikke tómendetýge múmkindik berdi. Degenmen de osy indet deńgeıiniń tómendeýine qaramastan, ótken jyly bul aýrýdan respýblıkalyq deńgeıden joǵary ólim-jitim Aqmola, Pavlodar, Soltústik Qazaqstan, Shyǵys Qazaqstan, Qostanaı, Jambyl, Qaraǵandy oblystarynda jáne Almaty qalasynda tirkeldi»,-dedi mınıstr.
Onyń sózine qaraǵanda, qan aınalysy júıesi aýrýlarynyń saldaryna temeki shegý, alkogoldik ishimdikterdi paıdalaný, salmaqtyń artyq bolýy áser etýde.
«Ótken jyldyń qorytyndysy boıynsha kardıolog dárigerlerdiń jetispeýshiligi Aqmola oblysynda 79 paıyzdy, Almaty oblysynda 64, Batys Qazaqstanda 60 paıyzǵa jýyq, Aqtóbe oblysynda 50 paıyzdy, sondaı-aq Qostanaı, Soltústik Qazaqstan, Jambyl oblystarynda 40 paıyzdan asady. Al Almaty qalasynyń ózinde kardıologtarǵa degen qajettilik 62 paıyzǵa jetip otyr»,-dedi Densaýlyq saqtaý mınıstri.
