Sońǵy 4 jylda Eýropada 170-ten astam memlekettik qyzmetker oqytyldy
ASTANA. QazAqparat - Sońǵy 4 jylda Eýropalyq Odaq elderinde 171 memlekettik qyzmetker bilimderin jetildirip keldi.
Bul týraly búgin Astanada «Memlekettik qyzmettegi zamanaýı úrdister men reformalar» atty konferentsııada QR Memlekettik qyzmet jónindegi mınıstrdiń orynbasary Inna Ahmetova málim etti.
«Qazaqstan Úkimeti memlekettik qyzmetiniń reformasy jáne jańǵyrtylýy» atty joba aıasynda 171 memlekettik qyzmetker úshin 25 sapar uıymdastyryldy. Jaqynda ǵana bizdiń mınıstrliktiń sarapshylyq toby Danııa men Nıderland elderinde bolyp, memlekettik qyzmetterdi ortalyqtandyrýdaǵy kadrlardy josparlaý men memlekettik apparatty ońtaılandyrý baǵytyndaǵy tájirıbelerin kórip qaıtty», - dedi vıtse mınıstr.
Onyń aıtýynsha, aldaǵy kúnderi mınıstrlik qyzmetkerleri Estonııa men Ulybrıtanııaǵa baratyn bolady.
«Onda olar memlekettik apparattyń jumysyn tıimdi uıymdastyrý, elektrondyq úkimetti damytý, memlekettik apparattaǵy qaǵazbastylyqty azaıtý jáne júıeni tolyq ońtaılandyrý baǵytynda tájirıbe almasady», - dedi I.Ahmetova.
Eske sala keteıik, Eýropalyq Odaqtyń «Qazaqstan Úkimeti memlekettik qyzmetiniń reformasy jáne jańǵyrtylýy» atty joba bıyl aıaqtalady. Ol bizdiń elde 2012 jyldyń qańtar aıynan bastap, tórt jyl júzege asyrylyp keldi. Eýropalyq Odaq jobaǵa 4,5 mln. eýro qarajat bólgen bolatyn.
