Sońǵy 4 jylda balyq ónimderiniń eksporty 3 esege artty - Qyrymbek Kósherbaev
QYZYLORDA. QazAqparat - Aral balyǵy Eýropada erekshe tanymaldylyqpen tutynyla bastady. Búginde 8 balyq óńdeý zaýytynyń 3-ýiniń evro kody bar jáne olar Eýropa elderine balyq ónimderin eksporttaıdy.
Búginde Qyzylorda oblysynda «Syrdarııa ózeniniń arnasyn retteý jáne Aral teńiziniń soltústik bóligin saqtaý» jobasynyń (SARATS-2) ekinshi kezeńin júzege asyrý jumystary júıeli túrde atqarylýda. Bul týraly Qyzylorda oblysynyń ákimi Qyrymbek Kósherbaev QR Premer-Mınıstri Baqytjan Saǵyntaevtyń jumys sapary barysynda aımaq ekonomıkasyn jańǵyrtý máseleleri boıynsha ótken jıynda málim etti, dep habarlady QazAqparat.
- Syr óńiriniń turǵyndary SARATS-1 jobasynyń birinshi kezeńin júzege asyrǵany úshin Memleket basshysyna shynaıy rızashylyǵyn bildiredi. Osynyń nátıjesinde Kishi Aral ekologııasynyń jaqsarýymen qatar balyq ónerkásibi qaıta túledi. Balyq sharýashylyǵy oblys ekonomıkasynyń mańyzdy salalarynyń birine aınalyp otyr. Sońǵy 4 jylda bizdiń aımaqta balyq óndirý kólemi 65 paıyzǵy artyp, balyq ónimderiniń eksporty 3 ese ulǵaıdy. Sonymen birge bizdiń kásipker Ýlıanov oblysynyń Dımıtrovgrad qalasynda balyq óńdeý zaýytyn salyp, Aral balyǵy Eýroazııalyq Odaq naryǵyn ıgerýde, - dedi oblys ákimi Q.Kósherbaev.
Onyń aıtýynsha, jobanyń ekinshi kezeńi Aral óńirin odan ári qaıta túletýdi, sýdy paıdalaný tıimdiligin jaqsartýdy jáne Syrdarııa ózeniniń tómengi aǵysynda sý resýrstaryn basqarýdyń tıimdiligin arttyrýdy kózdeıdi.
