Sońǵy 3 jylda shaǵyn jáne orta bıznes jumysyna zańsyz aralasqan 360 laýazymdy tulǵa sottaldy

NUR-SULTAN. QazAqparat - Sońǵy 3 jylda shaǵyn jáne orta bıznes jumysyna zańsyz aralasqan 360 laýazymdy tulǵa sottaldy. Bul týraly onlaın brıfıng barysynda QR Sybaılas jemqorlyqqa qarsy is-qımyl agenttigi 1-shi departamenti basshysynyń orynbasary Danııar Aqýan aıtty, dep habarlaıdy QazAqparat tilshisi.

«Agenttik shaǵyn jáne orta bıznes qyzmetine memlekettik organdardyń zańsyzaralasý faktileriniń jolyn kesý jumystaryn belsendi júrgizip jatyr. Sońǵy 3 jylda jáne osy jyldyń ótken kezeńiniń ishinde bul baǵytta 1 043 faktisiniń joly kesilip, 724 laýazymdy tulǵa jaýapqa tartylsa, onyń 360-y sottaldy», - dedi ol.

Onyń atap ótýinshe, agenttik qabyldanǵan sharalar 1 myńnan astam kásipkerdiń quqyǵyn qorǵaýǵa múmkindik berdi. Bul rette zańsyz áreketterdiń 786 faktisi paraqorlyqqa, 96-sy alaıaqtyqqa jáne 44-i laýazymdyq ókilettigin asyra paıdalanýǵa qatysty bolyp otyr.

Sonymen qatar ol memlekettik satyp alý protsedýrasyn ótkizý barysyndaǵy jemqorlyq táýekelderdiń tyıylmaı otyrǵandyǵyn basa aıtty.

«Máselen, Qostanaı oblysynda oblystyq onkologııalyq dıspanserdiń bas dárigeri Naýryzov pen onyń orynbasary Bópejanov sottaldy. Olar zerthanalyq zertteýler júrgizýge arnalǵan preparattardy jetkizý boıynsha tólem qujatyna kedergisiz qol qoıǵandary úshin JShS ókilinen 4,4 mln teńge para alǵan»,- dedi Danııar Aqýan.