Sońǵy 2 jylda Qazaqstan aýmaǵynan Sırııaǵa birde-bir azamat barǵan joq - UQK

ASTANA. QazAqparat - Ulttyq qaýipsizdik komıteti qyzmetkerleriniń aldyn alý jáne túsindirý jumystaryn júrgizýiniń arqasynda sońǵy 2 jylda Sırııadaǵy qaqtyǵys aýmaqtaryna Qazaqstan aýmaǵynan birde-bir adam shyqpaǵan, dep habarlaıdy QazAqparat tilshisi.

«Álbette, Syrtqy ister mınıstrligindegi áriptesim (vıtse-mınıstr Erjan Ashyqbaev - avt.) aıtqandaı, bul baǵyttaǵy jumys ary qaraı jalǵasyn tabady. Qaqtyǵys bastalǵaly beri, árıne, barlyq jaýapty memlekettik organdar aýqymdy jumys júrgizgen bolatyn. Aldyn alý jáne túsindirý jumystarynyń arqasynda ondaǵan, júzdegen adam atalmysh aýmaqtarǵa barý týraly oılarynan qaıtty. Ekinshi jaǵynan, kóptegen adamdar úshinshi memleket arqyly qaqtyǵys aýmaqtaryna jetip otyrǵan. Osy rette atqarylǵan jumystardyń jemisin qazirgi tańda mine, kórip otyrmyz. Sońǵy eki jylda birde-bir azamat Qazaqstan aýmaǵynan qaqtyǵys aımaqtaryna shyqqan joq», - deıdi QR Ulttyq qaýipsizdik komıtetiniń departament basshysy Baqytbek Rahymberdıev QR SІM-de ótken baspasóz máslıhatynda.

Onyń aıtýynsha, «Jýsan» gýmanıtarlyq operatsııasy aıasynda qaıtarylǵan azamattarǵa probatsııalyq baqylaý júrgiziledi.

«Sırııa, Irak elderine baryp, sol jerdegi jaǵdaıdy óz kózimen kórip, túsinip qaıtyp kelgenderdiń kóbisi profılaktıkalyq jumysqa belsendi túrde qatysady. Sonymen birge, ótken jyly jaýapty memlekettik organdarmen birlese otyryp, radıkaldy aǵymdarǵa qatysy bar 58 shetel azamatyn óz elderine deportatsııaladyq», - deıdi ol.

Eske sala ketsek, buǵan deıin QR Ulttyq qaýipsizdik komıtetiniń departament basshysy Baqytbek Rahymberdıev «Jýsan» operatsııasy boıynsha Sırııadan elimizge qaıtarylǵan azamattardyń jeteýiniń ústinen qylmystyq iz qozǵalǵanyn habarlaǵan edi. Onyń aıtýynsha, UQK-da Sırııadan qashpaq bolǵan birneshe qazaqstandyqtyń ólim jazasyna kesilgeni týraly málimetter bar.