Sońǵy 2 jylda elimizdiń tutastyǵy men qaýipsizdigine nuqsan keltiretin úndeýleri bar myńǵa jýyq saıt qyzmetine tosqaýyl qoıyldy

Bul týraly búgin elordada ótip jatqan Qazaqstan din tanýshylarynyń ІІ Forýmynda QR Din isteri agenttigine qarasty Mádenıetter men dinderdiń halyqaralyq ortalyǵynyń dırektory Aıdar Ábýov aıtty.

«Sońǵy 2 jyldyń ishinde Qazaqstan Respýblıkasynyń tutastyǵy men qaýipsizdigine nuqsan keltiretin úndeýleri bar myńǵa jýyq saıttyń qyzmetine shekteý qoıyldy», - dedi ol.

Onyń atap ótýinshe, QR Din isteri agenttiginiń sarapshylary saıttarǵa saraptama jasaý kezinde qazaqstandyq saıttardyń ózindik erekshilikterin anyqtaǵan. Mundaı saıttar negizinen dinı ilim men jergilikti dástúr, ulttyq mádenıettiń erekshelikterin utymdy paıdalanady. Máselen, salafııa, akıda.kz syndy  saıttar Qoja Ahmet ıAsaýı, Beket ata sekildi ata-babalarymyzdyń zırattaryna baryp, quran baǵyshtaýdy Allaǵa serik qosý dep, shelpek taratý sekildi ıslam dinimen sińisip ketken dástúrlerdi dinge jańashyldyq engizý dep aıyptaý  arqyly ınternet qoldanatyn jastar sanasyna óz ultynyń dástúri men saltyna jalpy ultyna qarsy pikir qalyptastyrady. Sondaı-aq salaf.kz, ıslamık.kz  saıttarynda  Paıǵambardyń týǵan kúni Máýlit merekesin, Ortalyq Azııa halyqtarynyń Naýryz meıramdaryn ruqsat etilmegen amaldar, kúná ister dep baǵalaýda.

«Osy kórinisterdiń ózi atalǵan saıttardyń ekstremıstik belgisi dep túsiný kerek», - dedi A.Ábýov.