Sońǵy 15 jylda áskerden jaltarǵan azamattar joq - Qorǵanys mınıstrligi

ASTANA. QazAqparat - Qazaqstanda sońǵy 15 jylda áskerden jaltarǵany úshin sottalǵan azamattar joq. Bul týraly Astanada ótken baspasóz máslıhatynda Astana qalasynyń Qorǵanys isteri jónindegi departamenti bastyǵynyń orynbasary, tárbıe jáne ıdeologııalyq jumystar bóliminiń bastyǵy Ǵanı Artyqov málim etti, dep habarlaıdy «QazAqparat» HAA tilshisi.

«Qazirgi ýaqytta Qazaqstannyń Qarýly Kúshteriniń qurylymyndaǵy jaýyngerler men serjanttardyń 70 paıyzy kelisimshart boıynsha, qalǵan 30 paıyzy merzimdi áskerı qyzmet boıynsha mindetterin atqarýda. Demek, merzimdi áskerı qyzmetshiler bir jyl boıy óziniń áskerı boryshyn óteıdi. Merzimdi áskerı qyzmetke barǵysy kelgenderdiń qanshasy áskerden jaltarady? Bizde áskerden jaltarý - joq. Kóp jaǵdaıda bizdiń azamattardyń quqyqtyq turǵyda saýatsyzdyǵyn baıqaýǵa bolady. Nelikten? Birinshiden, medıtsınalyq komıssııadan ótý jáne onyń nátıjesi shaqyrylýshyny áskerge 100 paıyz alyp ketetinin bildirmeıdi. Sondyqtan, shaqyrtý qaǵazy kelgennen keıin shaqyrylýshy birden medıtsınalyq komıssııadan ótýi kerek», - dedi Ǵanı Artyqov.

Onyń aıtýynsha, keıde komıssııadan ótken jastardyń ózi qandaı aýrýlarǵa shaldyqqanyn bilmeı jatady.

«Jas jigitti áskerge jiberý úshin aýdandyq deńgeıdegi - 10, oblystyq deńgeıdegi 10 dáriger tyńǵylyqty tekserý ótkizedi. Sonymen qatar, eger jas jigit áskerı qyzmetke barǵysy kelmese, oǵan 40 kúndik daıyndyqtan ótýge bolady. Sońǵy 15 jylda áskerı qyzmetten bultarǵany úshin sottalǵan azamat tirkelgen joq. Bul degenińiz bizdiń jastarymyzdyń áskerden bultarmaıtynyn bildiredi», - dep túıdi Ǵanı Artyqov.