Sońǵy 11 jylda jumysqa qabilettiliginen aıyrylǵandarǵa tólenetin járdemaqynyń kólemi 5 eseden astam ósti

ASTANA. QazAqparat - 2005-2015 jyldar aralyǵynda Memlekettik áleýmettik saqtandyrý qorynan (MÁSQ) jumysqa qabilettiliginen aıyrylý jaǵdaıyna baılanysty tólenetin áleýmettik járdemaqynyń ortasha kólemi 5,2 esege ósip, 10 761 teńgeni qurady (2005 jyly - 2 070 teńge bolǵan), asyraýshysynan aıyrylý jaǵdaıyna qaraı - 5,3 esege ulǵaıdy (2 634 teńgeden 14 058 teńgege deıin).

Bul týraly QR Densaýlyq saqtaý jáne áleýmettik damý mınıstrliginen habarlandy.

Sonymen qatar, jumysynan aıyrylý jaǵdaıyna baılanysty tólenetin MÁSQ járdemaqysy 7,3 esege ósip, 19 200 teńgeni qurady, al 2005 jyly 2 621 teńge bolǵan edi.

Atap aıtqanda, 2008 jyldan bastap júktilik pen bosanýǵa baılanysty, jańa týǵan náresteni (balany) asyrap alýǵa, 1 jasqa deıingi balanyń kútimine baılanysty MÁSQ járdemaqylary taǵaıyndalyp keledi. 7 jyldyń ishinde júktilik pen bosanýǵa, jańa týǵan náresteni asyrap alýǵa baılanysty kirisinen aıyrylýǵa tólenetin járdemaqy 1,8 esege (167 568 teńgeden 301 252 teńgege deıin) ósti, 1 jasqa deıingi balanyń kútimine baılanysty kirisinen aıyrylýǵa beriletin járdemaqy - 2,2 esege (9 557 teńgeden 20 729 teńgege deıin) ulǵaıdy.