Sońǵy 10 jylda Qazaqstannyń soltústigi, ortalyǵy men shyǵysynan 230 myń adam kóship ketken
PETROPAVL. QazAqparat – QR Eńbek jáne halyqty áleýmettik qorǵaý mınıstri Tamara Dúısenova Soltústik Qazaqstan oblysynda eldegi kóshi-qon saıasatyna qatysty atqarylyp jatqan jumystarǵa toqtaldy, dep habarlaıdy QazAqparat tilshisi.
QR Eńbek jáne halyqty áleýmettik qorǵaý mınıstri Tamara Dúısenova SQO-ǵa keldi. Mınıstr óńir kásipkerlerimen kezdesip, jıynda jumyspen qamtý jáne eńbek resýrstarymen qamtamasyz etý máseleleri talqylandy.
Kezdesýde Tamara Dúısenova sońǵy 10 jylda soltústik óńirlerden, ortalyq jáne Shyǵys Qazaqstannan 230 myń adam kóship ketkenin atap ótti. Sarapshylardyń boljamy boıynsha, 2030 jylǵa qaraı respýblıkanyń osy aımaqtarynda eńbekke qabiletti halyq sany 168 myń adamǵa qysqarýy múmkin.
«Halyqty utymdy qonystandyrýdy qamtamasyz etý jáne óńiraralyq sáıkessizdikke jol bermeý úshin memleket jumys kúshiniń utqyrlyǵyn arttyrý maqsatynda azamattardy erikti túrde kóshirý sharalaryn qolǵa alǵan.
Qonys aýdarýshylarǵa kóshýge materıaldyq kómek beriledi, turǵyn úıdi jalǵa alýǵa sýbsıdııalar bólinedi, jumyspen qamtamasyz etilip, kásipkerlik bastamalaryna qoldaý kórsetiledi. Osy jyldyń 7 aıynda jumys kúshi artyq óńirlerden jumys kúshi tapshy óńirlerge 3,8 myń adamnan turatyn 1 147 otbasy nemese osy jylǵa josparlanǵan kórsetkishterdiń 47 %-y kóshirildi», – dedi Tamara Dúısenova.
Sondaı-aq, mınıstr «Ashyq Qazaqstan 500+» kóshi-qon saıasatynyń tujyrymdamasy qalyptastyrylǵanyn habarlady. Ol elge bilikti kadrlardyń kelýin yntalandyrýdy, shetelde jumys isteıtin qazaqstandyqtardyń quqyqtaryn qorǵaýdy jáne el óńirleri arasyndaǵy demografııalyq teńsizdikti joıý tetikteriniń tıimdiligin arttyrýdy kózdeıdi.
Kezdesýge qatysqan kásipkerler jumys kúshi tapshy óńirlerde qandastar men ońtústikten soltústikke qonys aýdarýshylardy ornalastyrý tıimdiligin arttyrý boıynsha birqatar usynystar aıtty.
