Sońǵy 10 jylda elimizdegi kólik sany eki ese ósip, 3 mln. 3 myńǵa jetti - Kólik mınıstri
ASTANA. 24 qarasha. QazAqparat QazAqparat /Qanat Mámetqazyuly/ - Sońǵy 10 jylda elimizdegi kólik sany eki eseden astam ósip, 3 mln. 3 myńǵa jetti.
Búgin QR Parlamenti Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine mehanıkalyq kólik quraldaryn jáne olardyń tirkemelerin mindetti tehnıkalyq baıqaýdan ótkizý máseleleri boıynsha ózgerister men tolyqtyrýlar engizý týraly» zań jobasy boıynsha baıandama jasaǵan Kólik jáne kommýnıkatsııa mınıstri Ábilǵazy Qusaıynov osylaı málim etti.
Mınıstrdiń aıtýynsha, elimizdegi kólik quraldarynyń sany osydan 10 jyl buryn 1 mln. 500 myń bolsa, qazir olardyń sany 3 mln. 3 myńǵa deıin ósken. «Budan bólek kóliktiń túrlerimen qatar olardyń tehnıkalyq jabdyqtalýy da edáýir ózgerdi. Onyń ishinde de kólik parkiniń 80 paıyzy nemese 2,8 mln. avtokólik quraly 7 jyldan astam ýaqyttan beri paıdalanylsa, 520 myńnan astam kóliktiń paıdalanylǵan ýaqyty 20 jyldan asyp otyr. Bul rette kólik quraldarynyń tehnıkalyq jaǵdaıyna mezgil saıyn sapaly baqylaý júrgizý - olardyń qaýipsizdigin qamtamasyz etip, jol-kólik oqıǵalar sanyn azaıtýǵa múmkindik beredi»,- dedi mınıstr.
