Sońǵy 10 jylda elimizde pornografııa máselesimen qozǵalǵan qylmystyq is 5 esege artty - ІІM
ASTANA. 3 sáýir. QazAqparat - Sońǵy 10 jylda elimizde pornografııa máselesine qatysty qozǵalǵan qylmystyq is 5 esege artqan.
Onyń deni ǵalamtordan keletin kórinedi. Búgin QR Parlamenti Májilisiniń jalpy otyrysynda «1923 jylǵy 12 qyrkúıekte Jenevada jasalǵan, 1947 jylǵy 12 qarashada Nıý-Iork, Leık Sakseste qol qoıylǵan Hattamaǵa sáıkes engizilgen túzetýlermen Pornografııalyq basylymdar aınalymynyń jáne olardy saýdalaýdyń jolyn kesý týraly halyqaralyq konventsııany ratıfıkatsııalaý týraly» zań jobasyn talqylaý barysynda Іshki ister mınıstri Qalmuhanbet Qasymov osylaı málim etti.
Mınıstrdiń aıtýynsha, byltyr elimizde pornografııalyq sıpattaǵy 45 veb-saıt anyqtalǵan. «Al bıyldyń ózindegi eki aıdyń ishinde osyndaı 38 fakti de tirkelip otyr. Sondyqtan da, atalǵan Hattamaǵa qosylýdaǵy basty sebep - pornoındýstrııamen birlese kúresý. Biz osyndaı dúnıeni bıznes kózine aınaldyrǵandarmen Hattamaǵa qosylǵan 60 memleket aıasynda birigip kúresip, sol baǵyttaǵy baılanysty nyǵaıtamyz. Sonymen birge, ázirlenip jatqan jańa Qylmystyq kodeks jobasynda da bul eskeriledi. Meniń oıymsha tıisti túzetý jańa kodekste kórinis tabatyn bolady», - deıdi mınıstr Q. Qasymov.
