Sońǵy 10 jylda elimizde 2,6 mln bala pnevmokokkqa qarsy ekpe alǵan – DSM

NUR-SULTAN. QazAqparat – Qazaqstanda pnevmokokk ınfektsııasyna qarsy josparly vaktsınatsııalaý jalǵasyp jatyr. Bul jaıynda Májilis depýtattarynyń saýalyna oraı QR Densaýlyq saqtaý mınıstri Alekseı Tsoıdyń jaýabynda aıtylǵan, dep habarlaıdy QazAqparat tilshisi.

«Qazaqstan Respýblıkasynda pnevmokokk ınfektsııasyna qarsy vaktsınatsııalaý tegin medıtsınalyq kómektiń kepildik berilgen kólemi aıasynda josparly túrde júrgiziledi. «Medıtsınalyq kómektiń kepildik berilgen kólemi aıasynda olarǵa qarsy mindetti profılaktıkalyq ekpeler júrgiziletin aýrýlardyń tizbesin, ekpelerdi júrgizý qaǵıdalaryn, merzimderin jáne halyqtyń profılaktıkalyq ekpelerge jatatyn toptaryn bekitý týraly» Qazaqstan Respýblıkasy Úkimetiniń 2020 jylǵy 24 qyrkúıektegi № 612 qaýlysyna sáıkes pnevmokokk ınfektsııasyna qarsy profılaktıkalyq egý balalarǵa ómiriniń 2, 4 jáne 12-15 aılyǵynda úsh ret júrgiziledi», - deıdi mınıstr.

Onyń atap ótýinshe, Qazaqstan Respýblıkasynda pnevmokokk ınfektsııasyna qarsy josparly vaktsınatsııalaý 2010 jyldan bastap 13-valenttik konıýgatsııalanǵan vaktsınany qoldana otyryp júrgizilip keledi.

«Sońǵy 10 jylda elde pnevmokokkqa qarsy 2,6 mln bala egildi (7,4 mln astam egý aldy) jáne halyq arasynda jetkilikti ımmýndyq qabat qalyptasty. Ol osy ınfektsııanyń, ásirese egde jastaǵy adamdar arasynda taralý belsendiligin tómendetedi» deıdi Alekseı Tsoı.

Qazirgi kezde Qazaqstan Respýblıkasynda pnevmokokk ınfektsııasyna qarsy josparly vaktsınatsııalaý jalǵasýda.