Sońǵy 10 jylda densaýlyq saqtaý júıesin qarjylandyrý 10 esege artty - senator A. Bıjanov
Eýrazııa ulttyq ýnıversıtetinde ótken «Konstıtýtsııa - qoǵam men memlekettiń áleýmettik jańǵyrýynyń negizi» taqyrybyndaǵy halyqaralyq ǵylymı-tájirıbelik konferentsııa barysynda Parlament Senaty Áleýmettik-mádenı damý komıtetiniń tóraǵasy Aqan Bıjanov osylaı málim etti.
«Elimizdi áleýmettik memleket retinde jarııalaǵan Qazaqstannyń Konstıtýtsııasy áleýmettik-ekonomıkalyq damý júıesin qamtıtyn negizgi quqyqtyq baza. Munda qamtylǵan eńbek etý, densaýlyq saqtaý jáne laıyqty bilim alý quqyǵy barlyq Qazaqstan qoǵamynyń, jalpyadamzattyq qundylyqtardyń quramdas bóligi bolyp tabylady», - dedi A. Bıjanov.
Onyń aıtýynsha, Ata zań normalary negizinde qolǵa alynǵan memlekettiń keshendi sharalary arqasynda el azamattarynyń áleýmettik qorǵalýy jan-jaqty qamtylyp keledi. «Jalpy júzege asqan sharalar arqasynda aǵymdaǵy jylǵy jumyssyzdyq deńgeıi 5,3 paıyzdan aspady. Jumyspen qamtylǵandar sany 8,4 mln. adamdy qurady. Al halyqtyń naqty tabysy 12 paıyzdan asa ósti», - dedi senator. Sonymen qatar, depýtat árbir adam úshin eń joǵarǵy qundylyq onyń densaýlyǵy ekendigine toqtalyp, azamattardyń densaýlyǵyn saqtaý máselesi Ata zańda memlekettiń basty mindeti retinde belgilengenin aıtty. Asa mańyzdy osy baǵytta táýelsizdik jyldary naqty is-qımyl sharalary qamtylǵan.
«Máselen, sońǵy 10 jylda densaýlyq saqtaý júıesin qarjylandyrý 10 esege artyp, búgingi kúni jalpy ishki ónimniń 3 paıyzdan astamyn qurap otyr. Respýblıkada densaýlyq saqtaýdyń 700-den astam jańa ǵımarattary salynyp, medıtsınalyq qondyrǵylar úzdiksiz jańartylyp keledi. Ulttyq medıtsınalyq holdıngi qurylyp, postkeńestik keńistikte tuńǵysh ret Halyq densaýlyǵy jáne densaýlyq saqtaý júıesi kodeksi qabyldandy», - dedi Aqan Bıjanov.