Sońǵy 10 jylda bala týýǵa qatysty járdemaqy 8 esege artty
ASTANA. QazAqparat - Qazaqstanda 2008 jyldan beri bala týýǵa arnalǵan járdemaqy 8 esege artty. Bul týraly Eńbek jáne halyqty áleýmettik qorǵaý mınıstrligi Áleýmettik kómek departamenti dırektorynyń orynbasary Baljan Baıahatova málim etti, dep habarlaıdy QazAqparat.
«Sońǵy 10 jylda bala týýǵa qatysty járdemaqy 8 esege artty, ıaǵnı 16 380 teńgeden 142 947 myń teńgege deıin. 2017 jyldyń qorytyndysy boıynsha bala týýǵa qatysty járdemaqyny 392 myń adam 34,7 mlrd teńge somasynda aldy», - dedi B.Baıahatova balaly otbasylardyń áleýmettik qamsyzdandyrylýy máselesine arnalǵan baspasóz máslıhatynda.
Sonymen birge, bir jasqa deıingi bala kútimine arnalǵan járdemaqy sońǵy 10 jylda 4 ese artyp, 20 195 teńgeni qurady. 2017 jyldyń qorytyndysy boıynsha bir jasqa deıingi bala kútimine arnalǵan járdemaqy145 myń adamǵa 32,4 mlrd teńge somasynda aýdaryldy, al 2018 jyldyń 1 qańtarynda 132 myńǵa jýyq adamǵa 9,8 mlrd teńge jalpy somasynda qoldaý kórsetildi.
Budan ózge, B.Baıahatova 2008 jyldan bastap bala týýǵa jáne júktilikke baılanysty tabystan aıyrylǵan jaǵdaıda tólenetin tólemderdiń engizilgenin eske saldy. 2017 jyly 180 myńǵa jýyq adam 62,6 mlrd teńge somasynda atalǵan tólem túrin alǵan. Tek 2018 jyldyń 1 qańtarynda 68,5 myńǵa jýyq adamǵa 22,4 mlrd teńge aýdaryldy.
Bir jastan kámelettik jasqa tolǵanǵa deıingi balalar kútimine arnalǵan járdemaqylarǵa toqtalsaq, 2017 jyly ÁSMQ esebinen 225 myńnan asa adamǵa 74,1 mlrd teńge somasynda járdemaqy berildi. Búgingi tańda 265 myńnan asa adamǵa 29,2 mlrd teńge tólendi.
Sonymen qatar, jumys isteıtin áıelder sanynyń kóbeıýiniń oń úrdisi baıqalady, bul ÁSMQ esebinen bir jasqa deıingi bala kútimine arnalǵan járdemaqy alýshylar sanynyń artqanyn kórsetedi. 2013 jyly atalǵan járdemaqy túri 135 myńnan asa adamǵa aýdarylsa, 2017 jyly olardyń jalpy sany 225 myń adamdy qurady. Bul rette 2014 jyldan bastap bir jasqa deıingi bala kútimine arnalǵan tólemderdi alýshylardyń zeınetaqy jarnalaryn sýbsıdııalaýdyń engizilgenin aıta ketken jón.
«2017 jyly respýblıkalyq bıýdjetten derbes zeınetaqy shotyna bir jasqa deıingi bala kútimine arnalǵan járdemaqyny 85 myńǵa jýyq alýshyǵa ÁSMQ -dan 4,4 mlrd teńge aýdaryldy. 2018 jyldyń 1 mamyrynda 80 myńǵa jýyq alýshyǵa 1,4 mlrd teńge bólindi»,-dedi B.Baıahatova.
