Sońǵy 10 jyl ishinde Qazaqstanda jol-kólik oqıǵalarynyń saldarynan 30 myńnan astam adam mert bolǵan

Al 165 myń adam túrli dárejedegi dene jaraqattaryn alǵan. Bul málimetterdi búgin Qazaqstan Respýblıkasy Prezıdenti janyndaǵy Adam quqyqtary jónindegi komıssııanyń otyrysynda Іshki ister vıtse-mınıstri Amanjol Kúreńbekov keltirdi, dep habarlaıdy QazAqparat.

«Baıyptap qarasaq, Qazaqstan osy jyldar ishinde respýblıkanyń Amola oblysyndaǵy Atbasar sııaqty shaǵyn qalasynyń turǵyndarynnan túgeldeı aıyrylyp otyr. Atalmysh jaǵdaı jolda júrý tártibine qatysty máseleni Memleket basshysynyń Qaýipsizdik keńesinde qaraýǵa májbúr etti. Atalmysh keńestiń otyrysynda aıtylǵan máseleler negizinde jol polıtsııasy qyzmeti jol qaýipsizdigin saqtaý sharalaryn qadaǵalaýdy qatańdatty jáne olardyń barlyǵy qazir óziniń jemisin berip otyr», dedi vıtse-mınıstr.

Onyń málimetterine qaraǵanda, jolda qatań tártip ornatylǵaly tártip saqshylary 2 mıllıonnan astam ereje buzý áreketterin anyqtap, 4 myńnan astam mas júrgizýshilerdi ustaǵan. Sot sheshimimen 70 myńnan astam adam kólik júrgizý quqynan aıyrylyp, 11 myńnan astam adam ákimshilik qamaýǵa alynǵan. «Bul rette ákimshilik jaýapkershilik tek júrgizýshilerge ǵana emes jolaýshylarǵa da qoldanylyp otyr. Jol qaýipsizdigin buzǵany úshin 47 myńnan astam azamatqa aıyp salyndy», dedi A.Kúreńbekov.