Sońǵy 10 jyl ishinde 50 jyldaǵydan da kóp plastık óndirildi - Pol Emmet
ASTANA. QazAqparat - Sońǵy 10 jyl ishinde 50 jyldaǵydan da kóp plastık óndirilgen. Bul týraly «Let's do it world» jahandyq ekologııalyq qozǵalysynyń resmı ókili Pol Emmet «Kabar» agenttigindegi baspasóz máslıhaty barysynda málim etti, dep habarlaıdy QazAqparat.
Onyń aıtýynsha, qazirgi tańda plastıktiń 300-400 túri bar.
«Sońǵy 10 jylda álemde 50 jyldaǵydan da kóp plastık óndirilgen. Aldaǵy jyldarda onyń sany arta bermek. «Dúnıejúzilik tazalyq kúni» aktsııasynyń maqsaty - plastıkterdi adamdar turatyn jerlerden tazartý. Biz osy sharadan keıin jaǵdaıdyń ózgeretinine úmittenemiz», - dedi Emmet.
Sondaı-aq, ol Jańa Zelandııada 15 qyrkúıek kúni barlyq turǵyndardyń kóshege shyǵyp, eldi tazartatynyn aıtty. Osylaısha, aktsııa barysynda ár el bir táýlik ishinde óz aýmaǵyn tazartyp, qoqystan aryltady.
