«Sońǵy jaǵalaý»: tórt qalada Kaspıı kórmesi ashyldy

ASTANA. KAZINFORM — Astana, Almaty, Aqtaý jáne Atyraý qalalarynda bir mezette «Sońǵy jaǵalaý» atty fotokórme ashyldy. Kaspıı teńizi taqyrybyna arnalǵan kórmeni fotosýretshi Ospan Álı usyndy. Bul týraly Jibek Joly telearnasynyń «Búgin LIVE» baǵdarlamasynda málimdedi.

Shara High Caspian Week aıasynda halyqaralyq ekologııalyq, mádenı jáne medıa is-sharalar aptalyǵynyń bir bóligi retinde uıymdastyryldy.

Fotograftyń aıtýynsha, Kaspııdiń búgingi jaǵdaıyn beıneleıtin kórmeniń negizgi maqsaty — kórermen júregindegi emotsııany oıatý.

— Bıyl 12 tamyz — Halyqaralyq Kaspıı kúnine oraı tórt qalada bir mezette kórme ashý josparlandy. Save the Caspian Sea jahandyq qozǵalysy meni elshi retinde shaqyrǵan kezde qýanyshpen qatar úlken jaýapkershilik te sezindim. Sebebi tórt jyl buryn Kaspıı jaǵalaýyn túsirýdi bastaǵan bolatynmyn, — dedi Ospan Álı.

Fotograf túsirilim kezinde turǵylyqty turǵyndardyń kúndelikti ómirin kórsetýge, keıipkerlerdi tabýǵa basa mán bergenin atap ótti.

— Kórmege daıyndyq barysynda Kaspıı jaǵalaýyna jıi bardym. Keıde aýa raıynyń qolaısyzdyǵy jaqsy kadr jasaýǵa qıyndyq týǵyzady. Bir saparymda shekarashylardyń kómegimen Qulaly aralyna bardym. Sol jerde 31 jyl ómir súrgen Petr esimdi keıipkermen tanystyq. Bul araldy buryn ıtbalyqtar araly dep ataıtyn, al qazir ıtbalyqtar molasy desek artyq emes. Óz kózimmen 100-den astam ólekseni kórdim. Keıipkerim de buryn jaǵalaý úıiniń qasynda bolsa, búginde teńiz alystap ketkenin aıtty, — deıdi ol.

Fotosýretshi jumystary arqyly eshqandaı boıamasyz jergilikti shyndyqty jetkizýdi maqsat etken. «Sońǵy jaǵalaý» fotokórmesi atalǵan tórt qalada eki apta boıy kópshilikke ashyq bolady.

Eske salaıyq, Memleket basshysy Qasym-Jomart Toqaev Kaspıı teńizin, Balqash kólin, basqa da sý kózderin saqtap qalý máselelerin aıtqan bolatyn.