Sońǵy úsh jylda elge 1,12 trln teńge zańsyz aktıvter qaıtaryldy – Antıkor

ASTANA. KAZINFORM – Elimizden zańsyz shyǵarylǵan aktıvterdi qaıtarý sharasy jalǵasyp jatyr. Bul týraly Sybaılas jemqorlyqqa qarsy is-qımyl agenttiginiń resmı ókili Danııar Bıgaıdarov málim etti.

- Zańsyz shyǵarylǵan aktıvterdi qaıtarý boıynsha jumys qoǵamnyń memlekettik ınstıtýttarǵa degen senimin arttyrýǵa baǵyttalǵan negizgi mindetterdiń biri bolyp qala beredi. 2022 jyldan beri memleketke jáne kvazımemlekettik sektor sýbektilerine 1,12 trln teńgeden astam aktıv qaıtaryldy, - dedi Danııar Bıgaıdarov vedomstvoda ótken baspasóz máslıhatynda.

Resmı ókildiń aıtýynsha, qylmystyq jolmen alynǵan qarajat pen múlikti izdestirý jumystary el ishinde de, shetelde de júrgizilip jatyr.

- Osy maqsatta Qarjylyq monıtorıng agenttiginiń barlaý bólimshelerimen, sondaı-aq halyqaralyq seriktestermen belsendi yntymaqtastyq ornatylyp, beıresmı baılanys arnalary men basqa da jeliler paıdalanylyp jatyr. Bul urlanǵan qarajatty jedel anyqtaýǵa jáne qaıtarýǵa múmkindik beredi, - deıdi ol.

Ótken jyly qaıtarylǵan qarjyǵa 92 myń oryndyq 83 mektep salynatyny týraly habarlaǵan edik. 

Byltyr qaıtarylǵan aktıvter: Cartier, Breguet, Tiffany, Ulysse Nardin Classic qol saǵattary aýktsıonǵa shyǵarylatyny aıtyldy.