Sońǵy úsh jylda bilim berý uıymdarynda ınfektsııalyq qaýip artyp otyr
ASTANA. KAZINFORM — Sońǵy úsh jylda Qazaqstandaǵy bilim berý uıymdarynda toptyq ınfektsııalyq aýrýlar sany eki esege ósken. Bul týraly Úkimet otyrysynda Densaýlyq saqtaý mınıstri Aqmaral Álnazarova málimdedi.
Aqmaral Álnazarova Densaýlyq saqtaý mınıstrliginiń negizgi mindetteriniń biri — bilim berý jáne jazǵy demalys uıymdarynda sanıtarııalyq-epıdemıologııalyq baqylaýdy qamtamasyz etý ekenin alǵa tartty. Bul sharalar balalardyń qaýipsizdigin saqtaýǵa jáne ınfektsııalyq aýrýlardyń aldyn alýdy kózdeıdi.
Mınıstrdiń dereginshe, oqý jyly bastalǵaly beri mektepterde 347 tekserý júrgizilgen (150 josparly, 197 jospardan tys), onyń ishinde 49 as blogy qamtylǵan. Nátıjesinde birqatar júıeli buzýshylyq anyqtalǵan. Atap aıtqanda, sanıtarııalyq-tehnıkalyq jaǵdaıdyń talapqa saı bolmaýy jáne sanıtarııalyq-epıdemıologııalyq qorytyndylardyń joqtyǵy jıi kezdesedi.
— Sońǵy úsh jylda bilim berý uıymdarynda toptyq ınfektsııalyq aýrýlar sany eki esege óskeni baıqalady. 2023 jyly — 4 jaǵdaı tirkelse, 2024 jyly — 5, al 2025 jyly — 8 jaǵdaı anyqtalǵan. Osyǵan baılanysty Memleket basshysy memlekettik baqylaýdyń erekshe tártibin engizý týraly zańǵa qol qoıǵan. Jańa talaptarǵa sáıkes, 1 maýsymnan bastap monıtorıng júrgizilip, 1 shildeden bastap josparly tekserýler bastalady, — dedi spıker.
Sonymen qatar mınıstr óz sózinde 2025 jylǵy 1 qyrkúıekten bastap mektep máziri jańartylyp, jańa tamaqtaný standarty engiziletinin aıtty. Bul standart taǵam sapasyn jaqsartýǵa jáne qaýipsizdigin arttyrýǵa baǵyttalǵan.
Oqý-aǵartý mınıstrliginiń dereginshe, bıyl 187 jazǵy saýyqtyrý uıymyn ashý josparlanǵan. Qazirgi ýaqytta olardyń 53%-y ǵana ótinish bergen, al 33%-y balalardy qabyldaýǵa daıyn. Keıbir óńirlerde daıyndyq deńgeıi tómen.
Aıta keteıik, qysta balalar arasynda qandaı aýrýlar taraıdy, olardan qalaı saqtaný kerek ekenin jazǵanbyz.
