Sońǵy úsh jylda Balqash kóline 40 mlrd tekshe metrge jýyq sý jiberildi
ASTANA. KAZINFORM – Sońǵy úsh jylda Balqash kóline shamamen 40 mlrd tekshe metr sý kelip tústi. Bul kóldegi sý deńgeıin turaqtandyrýǵa múmkindik berdi, dep habarlaıdy Sý resýrstary jáne ırrıgatsııa mınıstrligi.
Vedomstvo málimetinshe, 2024 jyly Balqash kóline shamamen 15,9 mlrd tekshe metr sý jiberilgen. 2025 jyly bul kórsetkish 13,9 mlrd tekshe metrdi qurady. Al bıyl jyl basynan beri kólge 9,7 mlrd tekshe metrden astam sý kelip tústi.
Balqashqa sý transshekaralyq Іle ózeniniń aǵynyn retteıtin Qapshaǵaı sý qoımasynan jiberiledi. Bıyl sý qoımasy 98%-ǵa tolsa, aldyńǵy eki jylda 100% deńgeıine jetken.
– Іle ózeni arqyly Balqashqa keletin sý kólemi kópjyldyq ortasha kórsetkishke saı. Bul kóldegi sý deńgeıin turaqty ustap turýǵa múmkindik berip otyr. Qazir Balqashtyń sý deńgeıi Baltyq bıiktik júıesi boıynsha teńiz deńgeıinen 341 metr belgisinde saqtalýda. Sonymen qatar frantsýz sarapshylarymen birlesip, Balqash kólin 2040 jylǵa deıin saqtaýǵa arnalǵan bas jospar ázirlenip jatyr. Dalalyq zertteýler júrgizildi. Qazirgi ýaqytta alynǵan nátıjelerge taldaý jasalyp jatyr, – dedi Sý resýrstary jáne ırrıgatsııa mınıstri Nurjan Nurjigitov.
Mınıstrlik málimetinshe, Balqash kólin saqtaý jónindegi bas jospardy ázirleý jumystary frantsýz sarapshylarymen birlesip júrgizilip jatyr. Qazirgi ýaqytta dalalyq zertteýlerdiń nátıjeleri taldanýda.
Aıta keteıik, buǵan deıin 2025 jylǵy qazannan 2026 jylǵy sáýirge deıin Qapshaǵaı sý qoımasynan Balqash kóline 3,7 mlrd tekshe metr sý jiberilgeni habarlanǵan edi. Sonyń nátıjesinde kóldegi sý deńgeıi 29 santımetrge kóterilgen.
