Sońǵy úsh jylda Astanada aýa sapasy men Esil ózeniniń jaǵdaıy jaqsarǵan
ASTANA. KAZINFORM — Sońǵy úsh jyl ishinde elordada atmosferalyq aýanyń sapasy jaqsaryp, Esil ózeniniń ekologııalyq jaǵdaıynda oń ózgerister baıqalǵan.
Bul jóninde qalalyq Qoǵamdyq keńestiń otyrysynda Astana qalasynyń Qorshaǵan ortany qorǵaý jáne tabıǵatty paıdalaný basqarmasynyń basshysy Dáýlet Doskulov málim etti.
— Osy ýaqyt aralyǵynda Astanada qorshaǵan ortany qorǵaýǵa jumsalǵan qarjy kólemi ekologııaǵa keltirilgen zııan úshin jergilikti bıýdjetke túsken tólemderden 6,5 ese kóp boldy. «Qazgıdromet» málimetinshe, osy kezeńde qaladaǵy aýa sapasy jaqsarǵan. Sondaı-aq Esil ózeniniń ekologııalyq ahýalynda da oń ózgerister baıqalady. Máselen, 2023–2024 jyldary ózen tórtinshi sanattaǵy «lastanǵan» sý nysanyna jatqyzylsa, 2025 jyly úshinshi sanattaǵy «ortasha lastanǵan» deńgeıine ótken, — dedi basqarma basshysy.
Eske salaıyq, buǵan deıin Astanada Nura-Esil boıy qoqystan tazartylǵany týraly jazdyq.
