Úsh jylda 800-den astam avtokólik zańsyz tirkelgen — QMA

ASTANA. KAZINFORM — Ekologııalyq qaýipsizdikti qamtamasyz etý maqsatynda memleket jańa avtokólikterdi elge ákelýdi yntalandyrady. Bul rette kólik quralynyń jasyna qaraı bastapqy tirkeý alymdarynyń mólsherlemesi tómendetiledi. Bul týraly QMA málim etti.

— Sońǵy úsh jyl ishinde Agenttiktiń aýmaqtyq departamentteri kólik quraldaryn bastapqy tirkeý úshin alym tóleýden jaltarý faktileri boıynsha 88 qylmystyq isti tergedi. Bul ister boıynsha 1 800-den astam avtokólik zańsyz tirkelgen. Memleketke keltirilgen zalal 11,8 mlrd teńgeni qurady. Kúdikti retinde 70 adam tanyldy, olardyń qatarynda Ákimshilik polıtsııa basqarmasynyń basshylary men qyzmetkerleri, «Azamattarǵa arnalǵan úkimet» memlekettik korporatsııasynyń ókilderi jáne notarıýstar bar, — delingen habarlamada.

QMA málimetinshe, memleket bıýdjetine 900 mln teńge túsken. Sonymen qatar, quny 31 mlrd teńge bolatyn 1 500 avtokólikke jáne 968 mln teńgeniń kúdiktilerge tıesili múlkine tyıym salyndy.

— Aqmola oblysynda Ákimshilik polıtsııa basqarmasynyń qyzmetkeri bar topqa qatysty úkim shyǵaryldy. Olar 2020 jyldan 2022 jylǵa deıingi aralyqta 55 júk kóligin zańsyz bastapqy tirkeý arqyly memleketke 401 mln teńge kóleminde zalal keltirdi, — dep habarlady QMA-dan.

Sot olardy 2,5 jyl merzimge bas bostandyǵynan aıyrdy.

Sonymen qatar, memleket kirisine jalpy quny 125 mln teńgeni quraıtyn 3 páter men jeke turǵyn úı, sondaı-aq 21 mln teńge aqshalaı qarajat tárkilengeni belgili bolyp otyr. 

Eske sala keteıik, buǵan deıin QMA Mańǵystaý oblysynda halyqty qanaǵan qarjy pıramıdasyn anyqtaǵan edi.