Sońǵy úsh aıda 8 myńnan astam altyn quıma satyldy

ASTANA. KAZINFORM – 2025 jyldyń úshinshi toqsanynda QR Ulttyq banki ekinshi deńgeıli bankter men banktik emes aıyrbastaý pýnkterine jalpy salmaǵy 438,4 kg bolatyn 8 302 ólshemdi altyn quıma satty.

Altyn quımalar eń kóp satylǵan óńirlerdiń qatarynda Almaty (5 874 dana nemese 71%), Astana (600 dana nemese 7%) jáne Qaraǵandy oblysy (460 dana nemese 6%) bar.

Quımalardy halyq Halyk Bank, Eýrazııalyq bank, Jusan Bank, TsentrKredıt bankterinde jáne banktik emes jekelegen aıyrbastaý pýnkterinde satyp alyp, sata alady.

Jalpy alǵanda, 2025 jyldyń III toqsanynda bank pen aıyrbastaý pýnkteri keri satyp alynǵandaryn qosa eseptegende, halyqqa salmaǵy 409 kg bolatyn 9 110 quıma satqan.

Baǵdarlama iske qosylǵaly beri satylǵan altyn quımalardyń sany 246 882 danaǵa jetip, olardyń jalpy salmaǵy 8,6 tonnany qurady.

- Eń joǵary suranysqa ıe quıma – 10 gramdyq. Onyń úlesi barlyq satylymnyń 26%-yn (63 740 dana) quraıdy. Odan keıingi orynda 5 gramdyq (53 978 dana – 22%), 100 gramdyq (50 779 dana – 21%), 20 gramdyq (44 707 dana – 18%) jáne 50 gramdyq (33 678 dana – 13%) quımalar tur.

Árbir quıma aınadaı beti, mıkroteksti men bederli jıegi bar arnaıy qorǵanys qabymen qaptalǵan. Ol mehanıkalyq zaqymdanýdan saqtap qana qoımaı, quımanyń ashylǵan-ashylmaǵanyn anyqtaýǵa múmkindik beredi. Qorǵaý qaptamasy quımanyń sapa sertıfıkaty retinde de qyzmet atqarady. Sondyqtan altyn quımany uqyptap saqtap, qorabyn búldirmeý kerek, - dep jazylǵan habarlamada.

Ulttyq Bank atap ótkendeı, altyn quımalar – senimdi ınvestıtsııa quraly. Naryqtaǵy ótimdiliktiń negizgi kepili – bank pen aıyrbastaý pýnkteriniń klıentke aqshany sol kúni tóleı otyryp, quımalardy keri satyp alý múmkindigi bar.

Aıta keteıik, qazannyń ortasynda altyn men kúmistiń baǵasy rekord jańartty.