Sońǵy úsh aptada 1 mıllıonǵa jýyq palestınalyq Rafahtan ketti – BUU
ASTANA. KAZINFORM – Sońǵy úsh aptada Gaza sektorynyń ońtústigindegi Rafah qalasynan 1 mıllıonǵa jýyq palestınalyq qashyp ketti. Bul týraly Birikken Ulttar Uıymynyń Palestınalyq bosqyndarǵa kómek kórsetý jáne jumys jónindegi agenttiginiń áleýmettik jelide jarııalanǵan habarlamasynda aıtylǵan, dep jazady Anadoly.
Habarlamaǵa sáıkes, sońǵy úsh aptada kem degende 1 mıllıon palestınalyq Rafahty tastap, Gaza sektorynyń ártúrli bólikterine kóshýge májbúr boldy.
– Anklavta qaýipsiz keńistiktiń joqtyǵynan barar jeri bolmaǵan palestınalyqtar Izraıldiń úzdiksiz shabýyldarynan baspana izdeýge májbúr boldy. Sonymen qatar, agenttik azyq-túlik pen sý tapshylyǵyna nazar aýdardy. Gaza sektoryndaǵy palestınalyqtarǵa kún saıyn kómek kórsetý jáne olardy qorǵaý qıyndap barady, – delingen Uıym málimdemesinde.
Buǵan deıin 7 mamyrda Izraıl armııasy anklavtyń Mysyrmen shekarasyndaǵy Rafah baqylaý-ótkizý pýnktiniń palestınalyq bóligine baqylaý ornatylǵanyn habarlaǵan.
Mamyrdyń 26-sy kúni Izraıl Halyqaralyq qylmystyq sottyń sheshimine qarsylyq bildirip, Gaza sektorynyń Rafah qalasyndaǵy palestınalyq bosqyndar lagerine shabýyl jasady. Izraıl shabýylynda áıelder, balalar men qarttardy qosqanda keminde 45 palestınalyq qaza tapty. Sonymen qatar, taǵy 249 palestınalyq jaraqat aldy.
