Sońǵy on jylda jer júzinde qarýly qaqtyǵystar kóbeıip ketti — Prezıdent

TOKIO. KAZINFORM – Qazaqstan Prezıdenti álemde qaqtyǵystardyń órshýine alańdaýshylyq bildirdi. Bul týraly Aqordanyń baspasóz qyzmeti habarlady. 

Memleket basshysy daǵdarys beleń alǵan jáne kópjaqty yntymaqtastyq tetikteri aıtarlyqtaı álsiregen qazirgi kezde ádiletti ári turaqty álem qurý jónindegi oı-pikirimen bólisti.

— Sońǵy on jylda jer júzinde qarýly qaqtyǵystar kóbeıip, ýshyǵyp ketti. Álemdegi áskerı shyǵyndar byltyr 2,7 trıllıon dollar bolǵan. Buryn-sońdy mundaı bolmaǵan. Sonymen qatar alpaýyt elder arasyndaǵy strategııalyq baqtalastyq shyrqaý shegine jetti. Sonyń saldarynan BUU Qaýipsizdik Keńesi qandaı da bir iri halyqaralyq qaqtyǵystardy sheshe almaıtyn dármensiz kúıge tústi, — dedi Qasym-Jomart Toqaev. 

Qasym-Jomart Toqaev strategııalyq senimniń jańa mádenıeti halyqaralyq yntymaqtastyq pen ujymdyq sheshim qabyldaý úderisiniń negizi bolýǵa tıis ekenin aıtty.

Prezıdenttiń pikirinshe, halyqaralyq qoǵamdastyq ınstıtýttary tıimdi qyzmet etýi úshin ózara senimdi qalpyna keltirýi qajet.

— Strategııalyq senimniń jańa mádenıeti halyqaralyq yntymaqtastyq pen ujymdyq sheshim qabyldaý úderisiniń negizi bolýǵa tıis. Osy rette Qazaqstan atalǵan qaǵıdattardy Azııadaǵy ózara senim sharalary jónindegi keńes pen Álemdik jáne dástúrli dinder kóshbasshylarynyń sezi sekildi alańdar arqyly únemi ilgeriletip keledi. Búgingi syn-qaterlerge birde-bir memleket jalǵyz ózi tótep bere almaıtyny ras. Tek túbegeıli jáne tıimdi ujymdyq is-qımyl ǵana uzaq merzimdi nátıje beredi. Bul oraıda BUU halyqaralyq qatynastardy retteıtin ámbebap ári balamasy joq uıym rólin atqarýdy jalǵastyra berýi kerek, — dedi Qazaqstan Prezıdenti.

Aıta ketelik Qazaqstan Prezıdenti BUU ýnıversıtetinde dáris oqydy.