Sońǵy mınýtta soǵylǵan gol Brazılııany álem chempıonaty 1/8 fınalyna alyp shyqty
ASTANA. KAZINFORM - Búgin fýtboldan 2026 jylǵy álem chempıonatynda pleı-off satysynda Brazılııa quramasy Japonııany sońǵy mınýtta jeńip, 1/8 fınalǵa joldama aldy.
Álem chempıonatyn tamashalap júrgen jankúıerler bul kezdesýde Brazılııa quramasyna basymdyqty berip qoıǵan edi. Qazirge deıin bes márte jeńis tuǵyryna kóterilgen Ońtústik Amerıka qurlyǵynyń ókilderi pleı-off satysynan asa almaýy sensatsııalyq bolýy ábden múmkin. Dese de japonııalyq fýtbolshylar kezdesý aldynda tájirıbeli qarsylasyna laıyqty tótep beretinin málimdedi.
Kezdesý barysynda brazılııalyq qurama alǵashqy mınýttan tizgindi óz qolyna ustaýǵa tyrysty. Soǵan qaramastan Azııa qurlyǵynan kelgen fýtbolshylar qarsy shabýylǵa shyǵyp turdy. Osyndaı sátterdiń birinde olardyń qatarynan Kaısıý Sano 29-mınýtta múmkindigin múlt jibermeı, óz quramasyn alǵa shyǵardy. Birinshi kezeńde brazılııalyq fýtbtbolshylar tarazy basyn teńestire alǵan joq.
Ekinshi kezeńde olar dál osy qarqynda oıyndy órbitti. Nátıjesinde 56-mınýtta Kazemıro gol soqsa, Gabrıel Martınellı 96-mınýtta kózdegen nysanadan múlt ketken joq.
Osylaısha Brazılııa qarsylasynan 2:1 esebimen basym túsip, 1/8 fınalǵa joldama aldy.
Aıta ketsek, S tobynda synǵa túsken Ońtústik Amerıka qurlyǵynyń ókilderi óz tobynda 7 upaımen birinshi oryn aldy. Aldymen Marokkomen 1:1 esebimen teń oınap, odan qatarynan eki oıynda Shotlandııa men Gaıtıdi 3:0 esebimen tize búktirdi.
Al Japonııa F tobynda Nıderlandpen 2:2, Shvetsııamen 1:1 esebimen teń oınap, Týnısti 4:0 esebimen tize búktirdi. Nátıjesinde 5 upaı jınap, óz tobynda ekinshi orynǵa taban tiredi.
Eki qurama qazirge deıin on márte kezdesti. Onyń segizinde brazılııalyq fýtbolshylar jeńiske jetse, qalǵanynda teń nátıje tirkeldi.
Endi 30 maýsymda saǵat 01:30-da Germanııa men Paragvaı jasyl alańǵa shyqsa, 06:00-de Kot-d'Ivýar - Norvegııa quramalary kezdesedi.
Eske salsaq, budan buryn Kanada 1/8 fınalǵa berilgen alǵashqy joldamaǵa ıe boldy.
