«Sońǵy mılıa» jobasy boıynsha aýyldyq eldi mekenderge joǵary jyldamdyqty ınternet jetkiziledi
ASTANA. KAZINFORM – Jumys keńesi barysynda baılanys operatorlary Qazaqstan Respýblıkasy jasandy ıntellekt jáne tsıfrlyq damý vıtse-mınıstri Dosjan Musalıevpen birge «Sońǵy mılıa» jobasynyń iske asyrý máselelerin talqylady. Bul týraly Jasandy ıntellekt jáne tsıfrlyq damý mınıstrliginiń baspasóz qyzmeti habarlady.
Kezdesý aıasynda jobanyń negizgi mindetteri, oǵan qatysý sharttary men iske asyrý tetikteri, sondaı-aq baılanys operatorlaryna arnalǵan úlestik granttar alý boıynsha Ashyq konkýrs ótkizý máseleleri qaraldy. Jobaǵa qatysý tek shaǵyn jáne orta baılanys operatorlary úshin kózdelgeni atap ótildi.
Joba aýyldyq eldi mekenderdegi telekommýnıkatsııalyq ınfraqurylymdy damytýǵa jáne aýyl turǵyndaryn keminde 100 Mbıt/s jyldamdyqtaǵy ınternet jelisine qoljetimdilikpen qamtamasyz etýge baǵyttalǵan. Joba sheńberinde Internetke qoljetimdi jergilikti jelisi joq 1 123 aýyldyq eldi mekende talshyqty-optıkalyq baılanys jelilerin (TOBJ) salý josparlanyp otyr.
Talqylaýda baılanys operatorlarynyń ókilderi jobany iske asyrýǵa qatysty ózekti máseleler men problemalyq aspektilerdi kóterip, tehnıkalyq jáne uıymdastyrýshylyq máseleler boıynsha naqtylaýshy suraqtar qoıdy. Barlyq kóterilgen suraq boıynsha tıisti jaýap berildi.
Jobany iske asyrý nátıjesinde 445 myńnan astam úı sharýashylyǵy joǵary jyldamdyqty ınternetke qosylyp, shamamen 2,3 mıllıon adam ǵalamtor jelisine qol jetkizedi.
Joba aıasynda baılanys operatorlaryna rastalǵan kapıtaldyq shyǵyndardyń 50%-yna deıingi mólsherde qaıtarymsyz úlestik granttar usynylady. Qurylys jumystary operatorlardyń óz qarajaty esebinen júzege asyrylady, al salynǵan ınfraqurylym olardyń balansynda qalady. Qatysýshylardy irikteý teń qoljetimdilik, ashyqtyq jáne eseptilik qaǵıdattaryn saqtaı otyryp, Ashyq konkýrs negizinde júrgiziledi.
Buǵan deıin habarlaǵanymyzdaı, Qazaqstanda 504 eldi meken spýtnıktik ınternetke qosyldy.
