Sońǵy qońyraý men mektep bitirý is-sharalary: qandaı shekteýler qarastyrylǵan

ASTANA. KAZINFORM - Oqý-aǵartý mınıstrligi bıylǵy sońǵy qońyraý men mektep birtirý keshterin ótkizý tártibine qatysty túsinik berdi.

- Respýblıka mektepterinde oqý jyly 2025 jylǵy 23 mamyrda aıaqtalady. Oqý jylyn jalpy bilim beretin mektepter «Bilimim – Otanyma!» atty respýblıkalyq biryńǵaı synyp saǵatymen aıaqtaıdy. Synyp saǵatynda «Adal azamat» birtutas tárbıe baǵdarlamasynyń qundylyqtaryna basymdyq berý usynyldy. Synyp saǵatynda demalysta oqýǵa usynylatyn kitaptar tizimin, sondaı-aq qaraýǵa bolatyn fılmder tizimin usynyp, qaýipsizdik is-sharalary, aldyn ala josparlanyp uıymdastyrylǵan demalystyń artyqshylyqtary, qosymsha bilim berý uıymdaryna qatysýdyń tıimdiligi, sondaı-aq eńbek etýdiń paıdasy, ata-anaǵa, ata-ájelerine kómektesýdiń qajettiligi aıtylady, - delingen mınıstrliktiń Kazinform agenttigine bergen jaýabynda. 

Vedomstvo aqparatyna qaraǵanda, joǵaryda aıtylǵandy eskere otyryp, oqý jylynyń aıaqtalýy boıynsha 11-synyp túlekteri úshin saltanatty is-sharany pedagogıkalyq keńestiń usynysy negizinde 23-i nemese 24 mamyrda ótkizýdi qarastyrady (23-inen erte emes). 

- Pedagogıkalyq etıkany saqtaý jáne sybaılas jemqorlyq quqyq buzýdy aldyn alý maqsatynda ata-analardan qarajat jınaýǵa, anımatorlar, agenttikter men jeke stýdııalardy tartýǵa, kólik jaldap sherýler uıymdastyrýǵa, mektepke deıin bilim berý uıymdarynyń túlekteri úshin saltanatty is-sharalar ótkizýge jol berilmeıtini, mektep ákimshiligi men muǵalimderge syılyqtar alý úshin qarajat jınaýǵa qatań tyıym salynatyny eskertildi, - dep atalyp ótken Oqý-aǵartý mınıstrligi habarlamasynda. 

Budan buryn habarlanǵandaı, bıyl elimizde sońǵy qońyraýdy ótkizý kúni ózgerdi.