Sońǵy qońyraý: Ata-analar qymbat banketten bas tartyp jatyr

Sońǵy jyldary qymbat banketter, avtokortejder, tańdy qarsy alý men zańsyz aqsha jınaý máselesi jıi talqylanyp keledi. Bıyl Oqý-aǵartý mınıstrligi qaýipsizdik máselesin basty orynǵa qoıyp, mektep bitirý is-sharalaryna qatysty talaptardy taǵy da kúsheıtti.

– Negizgi maqsat – balalardyń qaýipsizdigi, ómiri men densaýlyǵyn saqtaý. Sondyqtan meıramhanalardaǵy banketter, avtokortejder, tańdy qarsy alý, tabıǵat aıasyndaǵy baqylaýsyz jıyndar sekildi formattarǵa tyıym salynyp otyr. Al balalardyń ustazdaryna, ata-analaryna alǵys aıtyp, shyǵarmashylyq formatta qoshtasýyna eshqandaı shekteý joq. Óleń, án, bı, teatrlandyrylǵan qoıylym, beınebaıan – barlyǵy qoldaý tabady, - dedi Oqý-aǵartý mınıstrligi Tárbıe jumysy jáne qosymsha bilim berý departamentiniń bas sarapshysy Jibek Nurjan.

Vedomstva málimetinshe, mektepterde ata-analardan aqsha jınaýǵa da qatań tyıym salynady.

Qazaqstan Respýblıkasynyń qoldanystaǵy zańnamasyna sáıkes, bilim berý uıymdarynda kez kelgen maqsatta, onyń ishinde sońǵy qońyraý men mektep bitirý keshterine aqsha jınaýǵa bolmaıdy. Sondaı-aq Ákimshilik quqyqbuzýshylyq týraly kodekske sáıkes quny 2 AEK-ten asatyn syılyqtardy nemese jeńildikterdi berýge jol berilmeıdi. Mundaı jaǵdaıda ÁQBtK-niń 676-baby boıynsha jaýapkershilik qarastyrylǵan.

Mınıstrlik ata-analar men oqýshylardan qarajat jınaý sybaılas jemqorlyq táýekeline jol ashatyn zańsyz áreket ekenin eskertedi.

Bıyl Elorda mektepteri de meıramhanadaǵy bitirý keshinen bas tartqan.

– Biz ata-analarmen sóılesip, eń aldymen qaýipsizdik máselesin kóterdik. Buǵan deıin saltanatty jıynnan keıin keıbir ata-analar balalaryn meıramhanada qaldyryp ketetin jaǵdaılar bolǵan. Sondaı kezde balanyń qaýipsizdigine kim jaýap beredi degen másele týyndaıdy. Sonymen qatar ár otbasynyń jaǵdaıy ártúrli. Qymbat kóılek, makııaj, shash úlgisi, meıramhana – munyń bári keı ata-analarǵa aýyr salmaq túsiredi. Osyny talqylaı kele, ata-analar ózderi ortaq sheshim qabyldap, qymbat keshten bas tartty, - deıdi №8 mektep-lıtseı dırektory Gúlnur Aıtymova.

Onyń sózinshe, mektep bitirý mindetti túrde dańǵazaly formatta ótýi kerek emes.

– Biz sońǵy qońyraý men attestat tabystaý rásimin este qalarlyqtaı ári tárbıelik máni bar formatta ótkizýdi jón kórdik. Balalar ustazdaryna arnap án aıtyp, bı bılep, teatrlandyrylǵan qoıylymdar daıyndap jatyr. Muǵalimderdiń de oqýshylarǵa arnalǵan tosynsyılary bar, - dedi Gúlnur Aıtymova.

Mektepte birneshe jyldan beri túlekterdiń aǵash egý dástúri qalyptasqan. Bıyl 70 túlek mektep aýlasyna 70 dekoratıvti aǵash ekken.

– Burynǵy túlekterdiń ózi de kelip, kezinde ekken aǵashtarynyń jaǵdaıyn surap jatady. Biz balalarǵa mekteppen baılanysty tek saýyq kesh emes, osyndaı paıdaly ister arqyly da saqtaýǵa bolatynyn túsindiremiz, - deıdi dırektor.

Al mektep túleginiń ata-anasy Ásel Qalıevanyń pikirinshe, mektep bitirý keshiniń basty qundylyǵy – sán-saltanat emes, balanyń qaýipsizdigi men sanaly bolashaǵy.

– Biz qymbat banketten ádeıi bas tarttyq. Qazir túrli keleńsiz jaǵdaılar kóp bolyp jatyr. Sondyqtan balalarymyzdy toı-tomalaqqa emes, bilimge, ǵylymǵa, ónerge baǵyttaýdy mańyzdy dep sanaımyz. Qarapaıym, shynaıy atmosferadaǵy keshtiń tárbıelik máni áldeqaıda joǵary. Eń bastysy – balanyń amandyǵy, - dedi ol.

Mınıstrlik ókilderi mekteppen qoshtasýdyń qaýipsiz ári mazmundy formattaryn qoldaıtynyn aıtady. Sońǵy jyldary kóptegen mektepte aǵash egý, bolashaqtaǵy ózine hat jazý, estelik kitap almasý sekildi dástúrler paıda bolǵan.

Aıta keteıik, bıyl oqý jylyn 3,9 mıllıonnan astam oqýshy aıaqtady.