Sońǵy eki jylda 1 myńnan astam atys qarýy tárkilendi — ІІM

ASTANA. KAZINFORM — ІІM uıymdasqan qylmysqa qarsy kúres bólinisteri turaqty negizde qarý, oq-dári men jarylǵysh zattardy tabý jáne tárkileý jónindegi jumys júrgizip jatyr.

Bıylǵy jyldyń basynan bastap jedel-izdestirý is-sharalaryn júrgizý barysynda 20 atys jáne travmatıkalyq qarý, onyń ishinde 4-ýi qańtar oqıǵasy kezinde joǵalǵan, sondaı-aq 6 granata jáne 150-den astam ártúrli kalıbrli oq-dári tárkilendi.

Mysaly, Almaty qalasynyń uıymdasqan qylmysqa qarsy kúres basqarmasy tergeý ızolıatorynyń qyzmetkerlerimen birlesip, Túrksib aýdanynda qarý jasyrylǵan jerdi anyqtady.

3 sholaq myltyq, 3 tapansha, 4 granata, shamamen 50 patron, sonymen qatar qańtar oqıǵasy kezinde qarý-jaraq dúkeninen urlanǵan karabın tárkilendi. Taraz qalasynda 2 sholaq myltyq jáne qańtar oqıǵasy kezinde urlanǵan jaýyngerlik arbalet tabyldy. Aqtóbede 56 patrony bar TOZ vıntovkasy men F-1 granatasy tárkilendi. Almaty oblysynda 2 qarý, RGD-5 granatasy jáne Kalashnıkov avtomatynyń 20 patrony, sondaı-aq qańtar oqıǵasy kezinde urlanǵan 2 Makarov tapanshasy tabyldy. Taldyqorǵan qalasynda jergilikti turǵynnyń avtokóliginen 5 travmatıkalyq tapansha tárkilendi.

— Sońǵy eki jylda uıymdasqan qylmysqa qarsy kúres bólinisteri zańsyz aınalymnan 1000-nan astam qarý-jaraq tárkiledi, onyń ishinde qańtar oqıǵasy kezinde urlanǵan 130 qarý bar. Bul baǵyttaǵy jumys Іshki ister mınıstrliginiń erekshe baqylaýynda, — dedi ІІM uıymdasqan qylmysqa qarsy kúres departamentiniń ókili Qýandyq Alpys.

Eske salsaq, Almatyda uıymdasqan 10 qylmystyq top ustalyp, júzge jýyq qarý tárkilengeni málim boldy.