Sońǵy bir jyldyń ishinde 41 366 adamdy ıt qapqan — Edil Jańbyrshın
ASTANA. KAZINFORM — Qoǵam buralqy ıtterdiń máselesin sheshýdi surap otyr. Bul týraly Májilistiń jalpy otyrysynda janýarlarǵa jaýapkershilikpen qaraý týraly zań jobasyn talqylaý kezinde depýtat Edil Jańbyrshın málim etti.
— Ortasha eseppen elimizde bir saǵatta bes adamdy ıt qaýyp, talaıdy eken. Biz osy zalda zań talqylap otyrǵan sátte, eldiń bir jerinde — aýlada, kóshede, mekteptiń mańynda, balalar alańynda nemese aıaldama janynda bir bala, áıel nemese qart adam ıt shabýylynyń qurbanyna aınalýy múmkin. Bul — emotsııa emes. Bul — qurǵaq statıstıka. Sondyqtan biz búgin jaı ǵana janýarlar týraly zań qarap otyrǵan joqpyz. Biz búgin adam qaýipsizdigi týraly, qoǵamdyq tártip týraly, memlekettiń jaýapkershiligi týraly, eń bastysy — adam ómiri men densaýlyǵyn qorǵaý týraly máseleni qarap otyrmyz. Óńirlerde turǵyndarmen kezdeskende, el buralqy ıtterdiń máselesin sheshýdi bizge amanattady. «Amanat» partııasynyń depýtattary ony moınyna alyp osy zań jobasyna bastamashylyq jasady, al basqa fraktsııalardaǵy áriptesterimiz bizdi qoldady, — dedi Edil Jańbyrshın.
Osy oraıda depýtat jergilikti atqarýshy organdardyń málimetine toqtaldy. Sońǵy bir jyldyń ishinde 41 366 adamdy ıt qapqan. Sonyń ishinde 23 134 adam buralqy ıtterdiń shabýylynan zardap shekken.
— Salystyrý úshin aıtsaq, 2024 jyly ıt shabýylynyń 38 848 jaǵdaıy tirkelse, onyń 24 410-y buralqy ıtterge tıesili. Bul turǵyda másele azaıyp jatqan joq. Ol áli de: júıeli, ótkir, áleýmettik turǵydan qaýipti másele bolyp otyr. Bul sandardyń artynda jaı ǵana esep emes, naqty adamdardyń taǵdyry tur. Onyń artynda balalardyń jaraqaty, azamattardyń qorqynyshy, psıhologııalyq kúızelis, múgedektikke alyp kelgen jaǵdaılar, al keıde — adam ólimi tur. Birneshe ǵana mysaldy eske salaıyn. Óskemende buralqy ıtter 11 jastaǵy balaǵa shabýyl jasady. Osyndaı jaǵdaılar Oralda, Kókshetaýda, Jalpaqsaı aýlynda, Qosshyda boldy. Al 2022 jyly Aqtóbe oblysynda buralqy ıtterdiń shabýylynan bala qaza tapty. Osyndaı árbir qaıǵyly oqıǵadan keıin qoǵam memleketke óte oryndy suraq qoıyp otyr: «adamdardyń qaýipsizdigine, buralqy ıtterge, júıeniń áreketsizdigine kim jaýap beredi?». Eger memleket osy suraqqa naqty jaýap bere almasa, onda másele tek ıtterde emes. Másele — quqyqtyq jáne basqarýshylyq vakýýmda, — dedi Edil Jańbyrshın.
Eske salsaq, byltyr kúzde Májilis depýtaty Edil Jańbyrshın janýarlarǵa jaýapkershilikpen qaraý jónindegi zań jobasyna qatysty túsinik berdi.
