Sońǵy bes jylda Transkaspıı baǵytymen júk tasymaly 3,5 esege artty
ASTANA. KAZINFORM — Búgin Qazaqstanda teńiz jáne ózen kóligi qyzmetkerleriniń kásibı merekesi atap ótip jatyr. Meıram byltyr Memleket basshysynyń tapsyrmasy boıynsha bekitilip, jumysshy mamandyqtarynyń bedelin arttyrýǵa, sondaı-aq sala qyzmetkerleriniń elimizdiń kólik-logıstıka júıesin damytýǵa qosqan úlesin jarııa etýge baǵyttalǵan.
Sý kóligi salasyn damytý — Qazaqstannyń kólik saıasatynyń mańyzdy baǵyttarynyń biri. Sońǵy bes jylda Transkaspıı halyqaralyq kólik baǵyty arqyly júk tasymalynyń kólemi 3,5 esege artqan.
— Júk tasymaly kóleminiń artýy teńiz ınfraqurylymyn keshendi damytý nátıjesinde múmkin boldy. Máselen, Aqtaý portynda qaıta tıeý jabdyqtary jańǵyrtylyp, konteınerlik hab salyndy. Quryq portynda túbin tereńdetý jumystary júrgizilip, qosymsha termınaldar salyndy. Tasymaldaý úderisin tsıfrlandyrý maqsatynda júkterdiń qozǵalysyn onlaın rejımde baqylaýǵa jáne «bir tereze» qaǵıdaty boıynsha sharttar jasasýǵa múmkindik beretin IT-platforma ashyldy, — delingen habarlamada.
2029 jylǵa qaraı Qazaqstan men Qytaı Transkaspıı halyqaralyq kólik baǵyty arqyly tasymal kólemin 300 myń JFE-ge deıin ulǵaıtýdy josparlap otyr.
Sonymen qatar, Qazaqstanda ishki sý kóligin damytý boıynsha jumystar jalǵasýda. Paıdalanýdan shyǵarylmaı úsh keme júretin shlıýzge kúrdeli jóndeý júrgizilýde, sondaı-aq shlıýzderdi basqarýdyń zamanaýı avtomattandyrylǵan júıesi engizilýde.
Sonymen qatar, Shyǵys Qazaqstan oblysynda ózen týrızmin damytý jáne Іle ózeni arqyly Qazaqstan men Qytaı arasynda halyqaralyq ózen baǵytyn qurý jobalary iske asyrylýda. Aıta ketý kerek, qabyldanyp jatqan sharalardyń nátıjesinde elimizdiń ishki sý joldarynda ózen kemelerindegi apattyq jaǵdaılar nóldik deńgeıde saqtalyp otyr.
Búginde sý kóligi salasynda 14 myńnan astam maman eńbek etýde. Qyzmetkerlerdiń kásibıligi, jaýapkershiligi jáne óz isine adaldyǵynyń arqasynda sý kóligi salasy damyp, tasymaldardyń sapasy men qaýipsizdigi artyp, Qazaqstannyń halyqaralyq kólik baılanystary nyǵaıýda.
Aıta keteıik, Qazaqstan Aqtaý portynyń áleýetin arttyryp jatyr.
