Sońǵy bes jylda otandyq geologııaǵa 1 mlrd dollar ınvestıtsııa tartyldy
ASTANA. KAZINFORM — Qazir el aýmaǵynda 12 ýchaskede geologııalyq barlaý jumysy júrip jatyr.
Bul týraly Ónerkásip jáne qurylys mınıstrligi Geologııa komıteti tóraǵasynyń orynbasary Marǵulan Baıbatyrov málim etti.
— Іri halyqaralyq kompanııalar geologııalyq barlaý jumystaryna shamamen 41 mlrd teńge ınvestıtsııa saldy. Jalpy sońǵy 5 jylda geologııa salasyna shamamen 1 mlrd AQSh dollary kóleminde jeke ınvestıtsııa tartyldy. Memlekettik geologııalyq zertteý aıasynda 12 ýchaskede sırek metaldardy izdestirý jumystary jalǵasyp jatyr, — dedi Marǵulan Baıbatyrov elordada ótip jatqan ІІІ halyqaralyq «Qazaqstannyń taý-ken» kongresinde.
Mamannyń málimdeýinshe, ken oryndaryn barlaý, zerdeleý jumystary uzaq ýaqyt alady jáne aýqymdy qarjyny talap etedi.
— Biz shamamen 800 myń tonna sırek jer metaldarynyń qoryna ıe ken ornyn taptyq. Sonymen qatar, salada belgili máseleler de bar. Sonyń biri ǵylymı qyzmetkerler tapshylyǵy, tabıǵı qordyń ornyn toltyrý deńgeıiniń tómendigi jáne geologııalyq barlaý jumysy jetkiliksiz qarjylandyrý sııaqty problemamen betpe-bet kelip otyr, — deıdi ol.
Buǵan deıin Marǵulan Baıbazarov Qazaqstan sırek jer elementteri boıynsha álemdik ondyqqa kirýi múmkindigi týraly aıtyp, salada atqarylyp jatqan jumys barysyna toqtaldy.
Aıta keteıik, búgin Astanada ІІІ halyqaralyq «Qazaqstannyń taý-ken» kongresi ótip jatyr. Іs-sharaǵa otandyq mamandardan bólek, Ortalyq Azııa elderinen kelgen geologtar, sarapshylar men kompanııa basshylary men ókilderi qatysyp jatyr. Sondaı-aq taý-ken óndirisi men tehnologııasyna arnalǵan kórme uıymdastyrylǵan.