Sońǵy bes jylda kólik salasynyń jalpy ónimi úsh esege artty — mınıstr
ASTANA. KAZINFORM — Sońǵy bes jylda kólik salasynyń jalpy ónimi úsh esege artty. Bul týraly QR Kólik mınıstri Nurlan Saýranbaev Úkimet otyrysynda málim etti.
Mınıstrdiń aıtýynsha, saladaǵy ósim eń aldymen temirjol ınfraqurylymyn damytý esebinen qamtamasyz etilgen. Qazirgi ýaqytta ótkizý qabiletin arttyrý maqsatynda birqatar iri joba júzege asyrylyp jatyr. Atap aıtqanda, «Moıynty — Qyzyljar» jáne «Darbaza — Maqtaaral» temirjol jelileriniń qurylysy aıaqtalýǵa jaqyn. Sonymen qatar Astana — Qaraǵandy baǵyty boıynsha úshinshi joldar, Arys — Qazaly ýchaskesinde ekinshi joldar salý josparlanǵan. Qyzyljar — Shubarkól — Esil jáne Inderbor — Maqat baǵyttarynda da jańǵyrtý jumystary júrgizilip jatyr.
— Táýelsizdik jyldaryndaǵy eń aýqymdy áleýmettik joba — «Temirjol vokzaldaryn jańǵyrtý» baǵdarlamasy iske asyrylyp jatyr. Joba aıasynda elimizdiń barlyq óńirindegi 124 vokzal qamtylǵan. Jumystar bekitilgen josparǵa sáıkes júrgizilip jatyr, — dedi mınıstr.
Sonymen qatar elimizde halyqaralyq deńgeıdegi strategııalyq kólik dálizderin damytý jalǵasyp jatyr. Qazirgi tańda 7 negizgi avtojol dálizi jumys isteıdi. 2029 jylǵa deıin birqatar ınfraqurylymdyq jobalardy iske asyrý kózdelgen.
Jıynda aıtylǵandaı, sońǵy bes jylda avtomobıl kóligimen tranzıttik tasymaldaý kólemi eki esege artyp, 6 mln tonnaǵa jetti.
Aeroport ınfraqurylymyn jańǵyrtý baǵytynda aldaǵy úsh jyl ishinde áýejaılardy kezeń-kezeńimen modernızatsııalaý kózdelip otyr. Astana áýejaıyn damytý — kezek kúttirmeıtin mindetterdiń biri. Bul baǵytta qala ákimdigi tıisti jumystardy bastap, qurylysty kelesi jyly bastaý josparlandy.
Sonymen qatar elde alty iri áýejaıdy (Almaty, Astana, Aqtaý, Aqtóbe, Qaraǵandy jáne Shymkent) qamtıtyn aerohabtardy damytý qolǵa alynǵan. Bul baǵytta ınstıtýtsıonaldyq jáne ınfraqurylymdyq jaǵdaılar jasalyp, jobalardyń edáýir bóligi jeke ınvestıtsııalar esebinen iske asyrylady.
Júk avıatsııasyn damytý da basym baǵyttardyń biri bolyp otyr. Bul elimizdiń tranzıttik áleýetin arttyryp, halyqaralyq logıstıkalyq tizbekterge ıntegratsııalanýǵa múmkindik beredi. Osy maqsatta bes jyldyq jospar ázirlenip, qajetti memlekettik sheshimder qabyldanǵan.
Teńiz ınfraqurylymyn damytý aıasynda konteınerlik habtar salý, porttyq prıchaldardy jańartý jáne túp tereńdetý jumystary júrgizilýde. Bul jobalar Transkaspıı halyqaralyq kólik baǵytyn damytýǵa serpin bermek.
Buǵan deıin Qazaqstanda eń tómengi jalaqyny arttyrý máselesi qaralatynyn jazǵanbyz.
