Sońǵy bes jylda Qazaqstanda 400-den astam esirtki zerthanasy joıyldy
ASTANA. KAZINFORM — Qazaqstandyq taraptyń suraýy boıynsha sheteldik bankterdegi 260 myń kúmándi shotqa shekteý qoıylǵan. Bul týraly Bas prokýratýranyń baspasóz qyzmeti habarlady.
Bas Prokýror Berik Asylov Birikken Ulttar Uıymynyń Esirtki quraldary jónindegi komıssııasynyń 69-sessııasynda sóz sóıledi.
Sessııa qatysýshylaryna jasalǵan negizgi úndeýdiń ózegi esirtki qaterine qarsy kúreste joǵary tehnologııalyq ádisterge kóshý boldy. Bul baǵyttaǵy biregeı úılestirý júıesi Qazaqstannyń quqyq qorǵaý organdaryna qylmystyń qarjylyq ınfraqurylymyn joıýǵa shoǵyrlanýǵa múmkindik berdi.
— Mundaı qarsy is-qımyl halyqaralyq sıpatqa ıe boldy, óıtkeni qazaqstandyq taraptyń suraýy boıynsha sheteldik bankterdegi 260 myń kúmándi shotqa shekteý qoıyldy.
Sońǵy bes jylda ýákiletti organdar 400-den astam esirtki zerthanasyn joıyp, 75 uıymdasqan qylmystyq toptyń qyzmetin toqtatty. Osy kezeńde zańsyz aınalymnan 147 tonnadan astam esirtki tárkilendi, onyń ishinde kólemi 13 tonnadan asatyn rekordtyq kokaın partııasy bar, — delingen habarlamada.
Bas Prokýror atap ótkendeı, esirtki bıznesin beıtaraptandyrý Qazaqstan úshin zańdylyq pen azamattardyń qaýipsizdigin qamtamasyz etýdiń negizi.
Qazaqstan delegatsııasynyń komıssııaǵa resmı múshe retindegi jańa mártebede qatysýy eldiń halyqaralyq qaýipsizdik júıesine tereń yqpaldasýynyń jáne ulttyq reformalardyń tıimdiligin moıyndaýdyń mańyzdy kezeńin bildiredi.
Qazaqstan halyqaralyq konventsııalardy ustanýmen qatar, ınternet keńistiginde esirtki saýdasyn anyqtaýǵa arnalǵan ınnovatsııalyq tsıfrlyq quraldardy belsendi engizýge daıyn ekenin rastady.
Talqylaý barysynda Bas prokýratýra, Ulttyq qaýipsizdik komıteti, Qarjylyq monıtorıng agenttigi, Іshki ister mınıstrligi jáne úkimettik emes uıymdardyń ókilderinen quralǵan Qazaqstan delegatsııasy álemdik qaýymdastyqqa esirtki bıznesiniń qarjylyq shottaryn buǵattaýdyń biryńǵaı tásilin qalyptastyrýdy usyndy. Bul onyń ekonomıkalyq negizderin áldeqaıda tıimdi álsiretýge múmkindik beredi.
Aıta ketelik arnaıy operatsııa barysynda Astana men Almatyǵa esirtki jetkizgen kúdikti ustaldy.
