Sońǵy bes jylda Ertis ormanynyń 2 myń tekshe metri otalyp ketken

PAVLODAR. KAZINFORM — Tabıǵatqa keltirilgen shyǵyn 65 mln teńgege baǵalanyp otyr. 

Соңғы бес жылда Ертіс ормандарының 2 мың текше метрі оталып кеткен
Фото: Павлодар облысы өңірлік коммуникациялар қызметі

Sybaılas jemqorlyqqa qarsy is-qımyl agenttiginiń Pavlodar oblysy boıynsha departamenti orman qorǵaý salasyndaǵy sybaılas jemqorlyq táýekelderiniń syrtqy taldaýyn jasady.

Taldaý kórsetkendeı, orman qorǵaý mekemeleri qyzmetiniń barlyq satysynda jemqorlyq táýekelderi baıqalǵan. Jaǵymsyz faktor saladaǵy uıymdastyrýshylyq-basqarýdan bastap aǵash tutynýshylarmen baılanysqa deıingi satylarda anyqtalǵan.

— Pavlodar oblysynyń ormandary zańyz kesilip jatyr. Muny qolymyzdaǵy statıstıkalyq derekter rastaıdy. Sońǵy bes jylda orman qorynyń 2 myń tekshi metr kólemi joıylyp, 216 zańsyz jaǵdaı tirkeldi. Keltirilgen shyǵyn 65 mln teńgege baǵalanyp otyr. Máselen, byltyr quramynda «Ertis ormany» rezervatynyń basshylyǵy bolǵan uıymdasqan qylmystyq toptyń jumysy toqtatyldy. Qylmystyq is sotta qaralyp jatyr. Buǵan qosa, rezervattyń Shaldaı fılıalynda jıyntyq quny 12 mln teńgege baǵalanatyn qaraǵaı tuqymynyń jetispeýshiligi anyqtaldy. Qazirgi ýaqytta tuqym rezervattyń balansyna qaıtaryldy, — deıdi Sybaılas jemqorlyqqa qarsy is-qımyl agenttiginiń Pavlodar oblysy boıynsha departamenti basshysynyń birinshi orynbasary Áset Ospanov.

Aımaqtaǵy orman resýrstaryn qalpyna keltirý mańyzdy másele bolyp otyr. Kóshet pen tuqym materıaldarynyń tapshylyǵy ormandy qalpyna keltirý jumystaryna qosymsha satyp alýlar uıymdastyrýdy talap etedi.

Alaıda bıýdjet shyǵyndaryn aldyn-ala boljaý tenderlerde jemqorlyq qaýpin arttyratyny baıqalady. Ásirese kóshetterdi satyp alý barysynda bul qubylys jıi boı kórsetip qalyp otyr. Baqylaýdyń jetkiliksizdigi qarjynyń urlanýyna jáne satyp alý úderisindegi aıla-sharǵylarǵa qolaıly jaǵdaı týdyryp otyrǵanǵa uqsaıdy.

Sybaılas jemqorlyqqa qarsy qyzmet erekshe qorǵalatyn tabıǵı aýmaqtardaǵy jemqorlyq táýekelderin syrtqy taldaý qorytyndysy boıynsha 35 usynys engizgen. Onyń úsheýi oryndalsa, ózgesi iske asý kezeńinde.

Eske sala keteıik, Ertis ormanyn otap satqan bas dırektor 150 mln teńge zalal ákelgen.
Orman sharýashylyǵy jáne janýarlar dúnıesi komıteti «Ertis ormanynda» 2029 jylǵa deıin aǵash kesýge tyıym saldy.

Сейчас читают