Sońǵy bes jylda 18-ge tolmaǵan 12 myńdaı qyz júkti bolǵan

ASTANA. KAZINFORM — Elimizde sońǵy bes jylda 18 jasqa tolmaǵan 12 myńdaı qyz bala júkti bolyp qalǵan. 

Bul týraly QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa tóraǵasynyń orynbasary Juldyzaı Ysqaqova aıtty.

— Áıelder isteri jáne otbasylyq-demografııalyq saıasat jónindegi ulttyq komıssııanyń qamqorlyǵymen jasóspirimder men jastar arasynda reprodýktıvti densaýlyqqa jaýapkershilikpen qaraý mádenıetin qalyptastyrý, sondaı-aq erte jynystyq qatynastyń jáne jynystyq jolmen beriletin ınfektsııalardyń qaýpi týraly shynaıy aqparattardy keńinen taratý maqsatynda memlekettik organdardyń, medıtsınalyq jáne bilim berý mekemeleriniń, úkimettik emes uıymdar men halyqaralyq seriktesterdiń kúsh-jigeri biriktirildi. Jaýapkershilikti tek mektepterge nemese ata-analarǵa artyp qoıýǵa bolmaıdy. Halyqtyń densaýlyǵy — bul barshaǵa ortaq jaýapkershilik ári ulttyq ıgiliktiń negizi, — dedi ol OKQ alańynda. 

Sondaı-aq spıker jastar men jasóspirimderdiń basym bóliginiń AITV týraly bilimi tómen ekenin atap ótti. 

— Sońǵy bes jylda elimizde 18 jasqa tolmaǵan shamamen 12 myń qyz bala júkti bolyp qalǵan. 15 pen 19 jas aralyǵyndaǵy jasóspirimderdiń úshten biri jynystyq belsendi, alaıda UNFPA zertteýleri boıynsha olardyń basym bóliginiń AITV men JITS týraly bilimi jetkilikti deńgeıde emes, — dedi Juldyzaı Ysqaqova.

Aıta keteıik, buǵan deıin senator sońǵy bes jylda jasóspirimder arasynda týý kórsetkishi shamamen 1,5 esege artqanyn aıtyp, dabyl qaqqan bolatyn.