Sońǵy aıaldama: Jastar teatrynyń kezekti premerasy qalaı ótti
ASTANA. KAZINFORM – Astana qalasy ákimdiginiń Jastar teatrynda «Sońǵy aıaldama» qoıylymy sahnalandy.
Onda jastardyń esirtkige áýestigi bir otbasyndaǵy tragedııalyq oqıǵa arqyly baıandalady. Spektakl Rahymjan Otarbaevtyń «Nashaqor týraly novella» pesasynyń jelisi boıynsha daıyndalǵan. Rejıssery – Nurfat Vahıtov.
Qoıylymdaǵy basty keıipker Jaqsylyq – sportqa jany qumar stýdent. Ata-anasy ony kishkentaıynan meıirimge bólep ósirgen. Súıgen janyn keziktirip, baqytqa bólenip, jarqyn bolashaqqa umtylǵan jigittiń ómiri esirtkimen betpe-bet kelgen tusta áp-sátte ózgerip sala beredi. Qoıylym otbasyndaǵy qarym qatynastyń rólin, qorshaǵan jandardyń adam ómirine qalaı áser etetinin, satqyndyq pen mahabattyń ara-jigin ashyp sýretteıdi.
Basty keıipker Jaqsylyqty oınaǵan Álıhan Jasanuly nashaqordyń rólin alyp shyǵý qıynǵa túskenin ári bul basty róldi alǵash somdaýy ekenin aıtty. Ol osy keıipkerin tolyq taný úshin esirtkige táýeldi adamdardyń júris-turysyn, ózderin qalaı ustaıtynyn ınternet arqyly biraz ýaqyt boıy zerttegen.
Al rejısser Nurfat Vahıtov spektakldi daıyndaýǵa eki aı ýaqyt ketkenin atap ótti. Birinshi aıdy qoıylymnyń sahnalyq formasyn jasaýǵa, josparlaýǵa arnasa, ekinshi aıdy akterlerdi daıyndaýǵa, spektakldiń ishki mazmunyn jasaýǵa jumsaǵan eken.
– Basynda spektakldiń ataýyn qoıýda bizde birneshe nusqa boldy. «Sońǵy doza», «Lomka», «Sos» degen attar usynyldy. Bir kúni men 15 jastaǵy qyzymnan qazirgi oqýshylardyń nashaqorlyq týraly oılaryn suradym. Sodan ol «Nashaqor týraly novellany» oqyp bolǵan soń kóńili bosap, qoıylymnyń atyn «Sońǵy aıaldama» dep qoıýdy usyndy. Ózim de ádebı turǵydan osy atty qaldyrǵandy jón kórdim, - deıdi qoıylym rejjıseri.
Nurfat bul spektaklge túpnusqa shyǵarmadaǵy sóz qoldanystarynan bólek zamanǵa saı etip túzetýler, termın sózder engizilgenin tilge tıek etti. Pesa jelisinde bir úıdiń jalǵyz balasynyń aty Jalqytaı bolsa, al sahnadaǵy keıipker Jaqsylyq esimimen basty rólin somdap shyǵady.
Qoıylym aıaqtalyp, kórermen tik turyp qol soqqannan keıin Jastar teatrynyń 2017 jyldan bergi turaqty kórermeni Mereı Serikqyzy premera týraly pikirin bildirdi. Onyń sózinshe, qoıylym qoǵamdaǵy ózekti taqyrypty joǵary deńgeıde jetkize alǵan.
– Maǵan oqıǵanyń sońy qatty unady. Kınolardaǵydaı sońy baqytty notada aıaqtalmaı, ómirdiń aşy bolsa da shyndyǵy anyq kórsetilgen. Menińshe, qoıylymnyń bulaı aıaqtalýy kórermenge tereń oı saldy. Sonymen qatar akterlerdiń oınaý sheberligi, bı bıleýi óte joǵary deńgeıde boldy, kórermendi sendire bildi dep oılaımyn, - deıdi teatrdyń turaqty kórermeni.
Aıta ketý kerek, Rahymjan Otarbaevtyń bul shyǵarmasy alǵash ret sahnalanǵan joq. Jastar teatrynan bólek, osyǵan deıin osy saryndas qoıylymdy Taraz qalasynda Jambyl qazaq drama teatry, Qyzylorda mýzykalyq drama teatry, Túrkistan qalasynyń sazdy-drama teatry jáne ózge de teatrlar kópshilikke usynǵan.
Sondaı-aq bul jolǵy Astana qalasy ákimdiginiń Jastar teatry atalǵan qoıylymdy Astana qalasy Polıtsııa departamentiniń Esirtki qylmystaryna qarsy is-qımyl basqarmasynyń tapsyrysymen daıyndady.
Eske sala keteıik, londondyq rejısser Pavlodar teatrynda Brehtiń «Peri qatyn» dramasyn sahnalaǵanyn jazǵan edik.
Jaına TURARBEK